Andecha Astur acusa al Gobiernu d’usar el llobu “pa tapecer la destruición del texíu agroganaderu”

|
Andecha Astur acusa al Gobiernu d’usar el llobu “pa tapecer la destruición del texíu agroganaderu”

La intención de Fernando Lastra d’aumentar les muertes de llobu nel 'Parque Nacional de Picos de Europa' n’un o dos exemplares ye p’Andecha Astur un mou d’enfrentar a ganaderos y ecoloxistes. Los nacionalistes acusen al Gobiernu d’usar a esti animal “pa tapecer la destruición del texíu agroganaderu” del país.

“El nuevu conseyeru d’Infraestructures y Mediu Ambiente del ‘Principado’, Fernando Lastra, bien de definir con claridá la que mui probatiblemente sedrá la so política a la hora d’enfrentar el problema del llobu: continuar cola inoperancia actual y centrase n’enguizar a los ganaderos y a los ecoloxistes, mentes el problema persiste, tapeciendo'l problema de fondu que costitúi l'esfarrapamientu del texíu socio-económicu arreyáu al seutor agroganaderu”, apunten nun comunicáu. Esta situación ye más grave entovía al enfrentar “a dos seutores perimportantes de la población asturiana, de los que depende la pervivencia de la nuesa biosfera y de les nueses formes de vida más tradicionales, que foron siempre aquelles que vivíen en comuña cola ñatura”.

Por esti motivu, Andecha Astur considera qu’axuntar estes dos estayes diba facer muncho bien “por caltener la bayura los nuesos montes”. Lo contrario ye, na so opinión, gastar “enerxíes en marraces valeres, demientres los que verdaderamente tienen la obligación y la posibilidá d’actuar continuen ensin plantegar soluciones científiques, matando llobos cuasique al debalu como única opción y ensin dar un pasu alantre que permita la convivencia pente especies”.

Ente les propuestes que cita la formación nacionalista destaquen l’autorizacion de dexar carroñes en monte, los controles mediante dron, les señales acústiques que torguen la entrada de los llobos con infrasoníos, la capadura seleutiva o la meyora y control de les indemnizaciones, soluciones “vidables económicamente gracies a los fondos europeos pa la protección d’especies y desoyíes sistemáticamente pola alministración asturiana, a la que nun-y interesa una solución real y la que tolo soluciona ordenando más muertes de llobos, nesti casu camudando los alcuerdos algamaos pa ordenar l’abatemientu d’otros dos na vertiente asturiana del Parque Nacional de Picos, onde yá s’autorizare la muerte d’otros cuatro exemplares recientemente”.

Contador Estadistiques