Ana Cano llee’l pregón de la Fiesta de la Sidra

Nava celebra güei el día grande de la Fiesta de la Sidra de Nava, ún de los acontecimientos festivos del mes de xunetu que desplacen a más xente a la capital sidrera, onde güei van repartise más de 2.000 llitros de la bébora mariello.

Anguaño, la pregonera de la fiesta va ser la presidenta de l'Academia de la Llingua Ana Cano, quien va lleer, a les 8 de la tarde, un pregón que, nes sos llinies xenerales, va falar de la cultura de la sidra y de tolo que l'arrodia y de cómo esi gran patrimoniu llega hasta güei, cuando la sidra entama una nueva dómina na que tienen d'axuntase la tradición con un futuru nel que la llingua asturiana ha seguir como vehículu d'espresión d'esa cultura.

Nun ye casual el fechu de que seya la presidenta de l'Alla seya la persona encargada de dar el pregón na fiesta de la sidra, y ye que l'Alla va dedicár el númberu de la revista "cultures" que va salir esti veranu a facer un monográficu sobre la cultura de la sidra. Nesti númberu, como yá ye vezu nos monográficos de la revista asturiana de cultura de l'Alla como'l de la cultura del pan que saliere en 1995, cada capítulu va dedicase a ún conceyu distintu. Pa esti númberu que ta yá pa salir, l'Alla cuenta coles collaboraciones de Xulio Viejo, Xosé Lluis Arias, Pili Fidalgo o, ensin salir de Nava, del ex - alcalde Xulián Fernández Montes.