Ana Cano afirma que la llingua "enxamás corrió tantu peligru de desapaición como nesti momentu históricu”.

La Sesión Extraordinaria de l'Academia de la Llingua, que la institución celebra añalmente con motivu del Día de les Lletres Asturianes, tuvo una protagonista d'escepción na persona de la poeta y filóloga Marta Mori d'Arriba, qu'ingresó na institución como académica de númberu. Pela so parte, la presidenta de l'ALLA Ana Cano fexo un discursu mui críticu cola situación actual nel que sorrayó como l'asturianu "enxamás corrió tantu peligru de desapaición como nesti momentu históricu". Ver discursu íntegru d'Ana Cano

Coles elecciones a poques selmanes, y nun actu que contó cola presencia ente'l públicu de políticos como'l Delegáu del Gobiernu Antonio Trevín, el candidatu del Partíu Popular Ovidio Sánchez o distintos los dirixentes d'Izquierda Xunida - Bloque por Asturies-los Verdes, Cano aseguró que "ensin normalización, la llingua muerre y ello ye una desgracia p'Asturies, porque, ente otres coses, supón qu'Asturies dexa de ser Asturies y hasta nós mesmos dexamos de ser asturianos". A la Presidenta de l'ALLA nun-y queda dulda de que "la próxima llexislatura va a ser decisiva pa les posibilidaes de sobrevivencia de la llingua" .

Amás de la parte más reivindicativa, el discursu de la Presidenta de l'ALLA fexo repasu de los llabores fechos pola Academia nel añu pasáu y tuvo tamién un momentu pa facer alcordanza d'Ígor Medio y Carlos Redondo, los músicos desapaecíos del grupu Felpeyu, y pal tamién desapaecíu militante asturianista Pablo Fernández. Cano agradeció'l llabor de grupos como la plataforma "Conceyu Abiertu pola Oficialidá (CAO) y Plataforma Cultural Eo-naviega, y pidió-yos a los escritores que sean conscientes del papel que xueguen na normalización social.