Amnistía Internacional presenta la segunda parte del CD “Ta nes nueses manes”

La organización Amnistía Internacional presentó esta mañana n'Uviéu la segunda parte del discu "non más violencia contra les muyeres - ta nes nueses manes" un volume que recueye 15 temes musicales cola violencia de xéneru como denominador común ente toos ellos.

Pa esta segunda parte d'esti proyectu musical y reivindicativu qu'entamó l'añu pasáu con temes de grupos y artistes asturianos, la propuesta enancha mires artístiques y inxerta temes n'asturianu, castellanu, catalán, euskera, gallegu y sefardí. Los Neños de la Escuela de Música Tradicional de Nava, Celia González, Joaquín Díaz, Lidia Pujol, Mikel Laboa, Retama, Xuacu Amieva, Miro Casabella, Fonsu Fernández, Joaquín Pixán, Muyeres, Javier Muguruza y Mariluz Cristobal Caunedo son los artistes que collaboraron nesta esperiencia musical y reivindicativa que se conseña nun CD y un cartafueyu internu con testos billingües en castellanu y asturianu, nel que s'inxerten los testos de los cantares y comentarios a cada tema afondando nes bases socioculturales de la violencia de xéneru, apuntándose les sos estremaes manifestaciones y el paralelismu de cada cantar cola violencia que sufren millones de muyeres sometíes en tol mundu a situaciones d'inxusticia, marxinación y miseria n'ámbitos tan estremaos como la familia, la comunidá o les situaciones de guerra. El discu, siguiendo cola llinia del anterior, quier demostrar como coses aparentemente tan inocentes y cencielles como los xuegos y cantares de neños puen llevar inxerta una actitú discriminatoria contra les muyeres.

El CD ta editáu pola casa Fono Astur, y amás de los artistes participantes, na so ellaboración collaboraron l'Axencia Asturiana de Cooperación al Desarrollu, l'Institutu Asturianu de la Muyer y les Conseyeríes d'Educación y Ciencia, Cultura, y Comunicación Social y Turismu, amás de la Fundación Centro Etnográfico Joaquín Díaz, Elkar, José Antonio Mártil Jiménez, Xuacu Amieva, Miro Casabella, Several Records S.L., Columna Música, Factoría Autor y el sellu Resistencia.