Alsa, ensin .com

Una resolución de Propiedá Intelectual reconoz el derechu d'una empresa de rexistru de dominios sobre ladirección www.alsa.com y obliga a la multinacional asturiana del tresporte a pagar el preciu que pidan los titulares del dominiu si quier facese con el.

Dende l'añu 1996, ALSA tenía rexistráu'l dominiu www.alsa.es, siendo una de les primeres empreses n'apuntase al dominiu español. Sicasí, col pasu del tiempu rescampló que'l sufixu .com yera muncho más popular y amañosu pa los internautes, sobremaera pa los que buscaben información dende fuera d'España, casu qu'afecta a ALSA, con servicios en Marruecos, China y Chile, ente otros llugares.

Alsa decidió entós garrar tamién el dominiu alsa.com, pero pa plasmu de la familia Cosmen, una empresa dedicada al comerciu de dominios d'internet, tenía yá rexistráu esi dominiu y pedía por elli nada menos que 199.500 dólares pola venta o un alquiler al mes de 3.999. Pa facese col .com, Alsa punxo un pleitu na Organización Mundial pa la Propiedá Intelectual (OMPI) que ta acabante de fallar en contra d'ALSA faciendo casu de l'argumentación del actual propietariu, que dicía que como esisten bien d'empreses nel mundu que trabayen baxo'l nome Alsa, la empresa asturiana nun tenía derechos adquiríos sobre la marca. Los dueños de www.alsa.com alegaron tamién que nun sabíen de la existencia de la empresa asturiana y dixeron que recibieren cerca de 300 solicitúes sobre'l dominiu, que rexistraron porque yera una combinación cenciella de cuatro lletres.

Si s'entra en www.alsa.com redirecciónase a la páxina de "Advanced Linux Sound Architecture", un sistema de software llibre qu'empleguen miles de programadores informáticos en tol mundu.