Alonso asustó n'Inglaterra

El pilotu asturianu Fernando Alonso punxo, hasta que-y rompió'l motor na vuelta 52, bien de la emoción nel Gran Premiu d'Inglaterra de Fórmula 1, que ganó'l brasileñu Rubens Barrichello (Ferrari). L'asturianu, que falló na vuelta rápida, namás pudo ser 8 na parrilla de salida, cuando'l compañeru d'elli en Renault sacare una brillante segunda posición. En saliendo, Alonso recuperó posiciones y tuvo nun tris d'adelantar a Michael Schumacher, pero tuvo de conformase con aguantar la 7ª plaza. La entrada d'un espontaneu a la pista torgó la marcha de la carrera, y pa cuando lu echaron, los turnos de cambios de ruedes dañaron al asturianu, que cayó a la 14 plaza. Ehí entamó una remontada d'asustar con adelantamientos al estilu d'Ayrton Senna sobre Villeneuve y Pizzonia y metiéndo-y a Schumacher 12 segundos.

Cuando Alonso taba pa adelantar a Trulli (que s'enquivocare al calzar cubiertes blandes) llegó la segunda parada en boxes y con ella los problemes. El coche calose y cuando lu arrancaron vieron que nun tenía control electrónicu de la tracción, pero con too y con ello Alonso volvió a remontar y llegó a la cuarta plaza, cola que contaba aguantar hasta que'l coche dixo "valió" na vuelta 52