L’ALLA entregó na so sede los premios de los Concursos d’Investigación 2014

|

La sede de l’Academia de la Llingua Asturiana (ALLA) acoyó esti vienres la entrega de los premios de los Concursos d’Investigación de la institución. Xabiel Fernández García, Damián Barreiro, Nel Ricardo Álvarez Morán, Yose Álvarez-Mesa y Sergio Manuel Buelga resultaron gallardonaos.

De los nueve concursos qu’entama añalmente l’ALLA quedaron ermos dos, el d’Investigación sobre Lliteratura Asturiana y el de Recoyida de Material Lliterario Oral, mentes que nel Recoyida Oral de Léxicu Asturianu’l xuráu correspondiente decidió entregar un áccesit de 300 euros al trabayu ‘Léxicu asturianu de la sidra con delles desplicaciones etimolóxiques y comentarios’, d’Inaciu Hevia, y de 150 a ‘Contribución al vocabulariu cabraliegu’, del que son autores Xuan Santori, Juan Vicente Inguazo y Herminia Mier. Esta mesma cantidá recibió Inaciu Galán nel concursu de Recoyida de Material Lliterario Escrito ‘Premiu Federico G.-Fierro Botas’  por ‘Coples d’Antroxu y otros testos n’asturianu con Xixón de fondu (1898-1928)’.

Los cinco restantes atoparon ganador, siendo’l de Recoyida de Material Toponímico Oral y el d’Investigación Llingüística’l que tuvieron más trabayos premios. Nel primeru, el merecedor de los 600 euros del gallardón foi Fernández García por ‘Toponimia de les parroquies de Lada y La Venta (Conceyu de Llangréu)’, mentes que ‘Toponimia de la collación de Caldones (Xixón)’, de Llorían García-Flórez y Xosé García Sánchez, y ‘Toponimia de La Baña. Contribución al estudiu de la llingua asturleonesa, de Jonatán Rodríguez Bayo, recibieron los áccesit de 300 y 150 euros, de manera respeutiva. Pela so parte, nel d’Investigación Llingüística, ganáu por Barreiro por ‘La nación televisada: llingua y identidá nos programes n’asturianu de TPA’, repartiéronse trés áccesit: ún de 300 euros a Pablo Suárez García por ‘Una traducción filolóxica y crítica de la Història de Jacob Xalabin, novelina anónima catalana del sieglu xv (Siguida de les de la Història de la filla de l’emperador Contasti y la Història de la filla del rey d’Ongria, cuentos anónimos catalanes del mesmu sieglu)’, y dos de 150 a Ana Álvarez García, por ‘Estudiu socio-económicu y xurídicu de les ordenances del Conceyu d’Uviéu, s. XIII’, y a Xuan Santori por ‘Percepciones dialectales sobre los procesos de normalización y estandarización del asturianu’.

Álvarez Morán resultó vencedor del de Llectures pa Rapazos gracies al trabayu ‘Tyan’, mentes que Álvarez-Mesa llevó’l concursu de Creación Lliteraria ‘Premiu Llorienzu Novo Mier’ pol poemariu ‘Como fueyes na seronda’. Por último, el ganador del Teatru foi Buelga cola obra ‘Ondina Llagu’.

Contador Estadistiques