Alerten d'irregularidaes nos trabayos de valtadera de la estación de L'Humedal

L'Asociación Española de Empresarios de Demolición (AEDED) ve irregularidaes nos trabayos de valtadera de la estación de L'Humedal, yá en marcha. Cree que deberíen volver a axudicase.

José Blanco, secretariu del coleutivu, aseguró a Asturies.com que la modificación del proyeutu fecha por Gijón al Norte, col usu d'una téunica de valtadera mecánica en llugar de la diamantada, prevista de manera inicial nel proyeutu, ye una modificación "sustancial" del proyeutu. Ésta última trai munches ventayes pola ausencia de vibraciones y una execución más silenciosa y rápida, "pero ye muncho más cara". Asina, l'axudicación de les obres fíxose nel 2011 por 6 millones d'euros y el gastu de los trabayos actuales taría "nun millón d'euros", con una diferencia de 4 millones que lleven a AEDED a reclamar un procesu nuevu.

La organización treslladó'l so esmolecimientu a Gijón al Norte y al Ministeriu de Fomentu, ensin recibir respuesta, y alerta de que les obres de valtadera yá tán en marcha. "Entendemos que se trata d'una situación irregular, al menos a la lluz de la información de la que nós disponemos, y por esti motivu ponse esti fechu en conocimiento públicu", apunten, pa darréu señalar que nunos díes los trabayos finarán "ensin que los contribuyentes nin les empreses sepan a ónde foi a parar la importante diferencia de costos ente'l métodu solicitáu nun primer momentu y el que se ta emplegando agora". De nun atopar aclaraciones pronto, AEDED va solicitar a la Fiscalía Anticorrupción qu'actúe d'oficiu.