PSOE y PP saquen alantre la llei que regula la RTPA y que marxina al asturianu

La Llei del Principaú d’Asturies de Segunda Reestructuración del Sector Públicu Autonómicu, que va regular la RTPA, aprobóse ayeri na Xunta Xeneral colos votos del PSOE, el so promotor, y del PP. El pautu d'estos dos partíos foi criticáu pola oposición, que considera que la fin de la mesma, no que respeuta al ente públicu de comunicación, ye controlar el mediu de cara a les eleiciones próximes nun momentu delicáu pa les dos formaciones.

Esta norma supón tamién un ataque nuevu pa col asturianu, yá que nun tien en cuenta les propuestes feches dende la Xunta pola Defensa de la Llingua Asturiana (XDLA) col sofitu de l'Academia de la Llingua Asturiana y una trentena de coleutivos sociales, que recoyeron en gran parte les enmiendes parciales de Foro y IX. Asina, según anunció Iniciativa pol Asturianu, ún de los firmantes del manifiestu ‘Cinco puntos por unos medios al serviciu públicu d’Asturies’, la referencia a la llingua asturiana nes funciones de la RTPA ye la siguiente: "La promoción de la educación y la cultura, particularmente asturiana, con especial protección del bable/asturiano y del gallego/asturiano, mediante la promoción de su uso y difusión". Dalgo insuficiente dafechu pa esti coleutivu, al igual que pa la XDLA, qu'afirma que la llei nueva ye "antidemocrática y privatizadora", continúa "marxinando sangrinamente al asturianu" y "fundirá l'ente definitivamente na precariedá llaboral, el clientelismu y la manipulación política".