Airbus presenta l’avión de llinia más grande del mundu

La compañía aeronáutica europea Airbus descubre esta mañana en Toulouse énte la prensa mundial l'airbus A380. Con dos pisos d'altura, 70 metros de llargo y 64 ente les puntes de les ales, l'Airbus A380 tien capacidá pa 555 persones y valta toles marques del Boeing 747, que dende l'añu 1970 en que se presentó yera l'avión de pasaxeros más grande del mundu con capacidá pa 450 persones. l'A380, casu de suprimise les primeres clases y la clase de negocios podría enanchar la so capacidá hasta los 830 pasaxeros ye tamién capaz de facer vuelos de 15.000 kilómetros ensin parar a cargar carburante, valtando la marca d'autonomía del avión americanu. Por de pronto, yá esisten 139 pidíos fechos d'esti nuevu avión a la fábrica, que va entame a sirvilos nel añu 2006, anque pa rentabilizar la inversión del diseñu del aparatu precísense de 250 aviones.

Nel actu de presentación tuvieron presentes los presidentes del Estáu francés, Jacques Chirac; el canciller d'Alemaña Gerhard Schroeder, el primer ministru británicu Tony Blair y el presidente español José Luis Rodríguez Zapatero, representando a los cuatro estaos socios de la compañía Airbus, empresa fundada nel añu 1970 a partir de la xuntura de delles grandes empreses aeronáutiques del continente y anguaño ye propiedá nun 80% del consorciu aeronáuticu y de Defensa européu EADS. España tien un 5,5% de participación al traviés de la Sociedá Estatal de Participaciones Industriales (SEPI, antiguu INI)
Más información na web de Airbus Industrie