Adolfo Camilo Díaz, ganador del "Montesín" de lliteratura xuvenil

L'escritor Adolfo Camilo Díaz foi'l ganador del premiu "Montesín" de lliteratura Xuvenil qu'organiza la editorial Trabe en collaboración cola Conseyería de Cultura. Camilo Díaz (Ayer, 1963) mereció'l premiu d'ente los 8 trabayos finalistes pol so llibru "Khaos"una llarga novela xuvenil de 322 páxines que se presenta nel acta del xuráu como "d'acción trepidante y futurista, con continues referencies a la cultura pop, los videoxuegos, los modernos sistemes de comunicación y entretenimientu, na que se planteen con crudeza conflictos sociales, racistes o sexistes".

La trama entama cuando yá se contabilicen miles de muertos y feríos per toa Asturies, y nella los tres protagonistes son trés mozos d'ente 16 y 18 años que tienen qu'enfrentase a unos acontecimientos que los superen pa intentar salvar el mundu y la so propia vida. El xuráu quixo destacarl'altu nivel de calidá de la mayor parte de los participantes y el calter "de verdadera novela" de la obra ganadora, que definió como "dura" y de la que destacó "el retratu de la sociedá asturiana del futuru, con unos protagonistes bien definíos qu'evolucionen a midida qu'avanza la trama y un ritmu narrativu áxil y modernu".

Severino Antuña, coordinador de publicaciones infantiles y xuveniles d'Ediciones Trabe, amás de traductor y profesor, María Xosé Rodríguez directora de la Oficina de la Llingua del Ayuntamientu de Xixón, la escritora Esther Prieto, escritora y Luis Casteleiro, tamién escritor y filólogu de la Oficina de Política Llingüística de la Conseyería de Cultura, formaron el xuráu que decidió'l premiu, actuando l'editor Antón García como secretariu. Dotáu con 2.500 euros ye'l premiu mayor cuantía pa esti tipu d'obres n'asturianu.