Aceralia va xubir la producción

El Conseyu d'alministración d'Aceralia aconceyó ayeri en xalé de La Granda n'Avilés, onde los directivos de la empresa tomaron decisiones importantes sobre'l futuru de les instalaciones asturianes del xigante del aceru.

En primer llugar, el Conseyu decidió xubir la producción d'aceru n'Avilés y Xixón en 500.000 tonelaes hasta llegar a los cinco millones, lo que supón una xuba de producción del 10%.

D'otra manera, el Conseyu apautó baxar los costes d'actividá en 350 millones d'euros d'rrequí a la vuelta de tres años, pa ello la empresa tien previsto entamar adaptaciones de plantiya per aciu de planes de xubilación anticipada que van negociase coles centrales sindicales. la empresa nun esclarió'l volume que va tener esta reducción de plantiya.

Nel capítulu de les infraestructures de producción, Aceralia alcordó escosar la vida útil de les bateríes de cok d'Avilés, determín esti que va tener funcionando los fornos avilesos hasta l'añu 2.017. La empresa xustifica esta decisión porque "representa una ventaya estructural p'Aceralia al menguar la dependencia esterior d'esta materia". La empresa argumenta qu'asina tamién se caltienen cerca de 500 empleos ente directos y indirectos e inversiones qu'anden sobre los 60 millones d'euros

El Conseyu d'Alministración tamién alcordó presta-yos atención especial a los clientes de la fastera mediterranea, oxetivu pal que van renovase productos y servicios y encurtase plazos d'entrega, apautándose amás la creación de centros d'escelencia en productos planos y un plan de de "rescate" en productos llargos.