Abre la casa natal del Padre Galo

Cadavéu celebra estos díes la décima Selmana del Padre Galo con una programación cultural y festiva que recupera l'alcordanza del que quiciás seya'l personaxe más apasionante de la historia de la llingua d'Asturies. Eruditu asturianista, poeta, escultor, músicu y pintor, el Padre Galo escribió miles de poesíes n'asturianu, dexando dellos de los versos más conocíos de la lliteratura asturiana, como aquellos que dicen qu'Asturies ta tatexando y n'ayén.

La mayor novedá de la Selmana del Padre Galo ye que, por fin, cinco años dempués de remocicase, la casa natal del artista,que tuvo trancada hasta va poco, abre al públicu, anque namás escepcionalmente con motivu de la selmana. La casa restaurárala y acuriosárala'l Principáu y la sociedá "La regalina" presentare un proyectu de xestión qu'incluyía un taller de ropa tradicional y dos biblioteques, una en castellanu y otra n'asturianu.

La intención orixinal yera la d'atropar tolos oxetos rellacionaos col Padre Galo que taben estraos per un montón de cases particulares del conceyu, pa poder convertir el sitiu nun muséu dedicáu a l'alcordanza del que foi ún de los meyores escritores de tolos tiempos na nuesa llingua, pero esti oxetivu nun se llogró pel momentu, anque los responsables de la sociedá "La Regalina" comenten que tan abiertos otra vuelta los calces de diálogu col conceyu y qu'e l'oxetivu podría conseguise d'equí a poco.

De momentu, paga la pena la visita a la casa, onde'l sacerdote y artista dexó escritos los sos versos en delles de les travieses de madera y nel corredor y na que ta restauráu hasta'l fornu orixinal, que volvió a a arroxase esta selmana pa cocer nelli les "alfiladas" (pan dulce que se pon nos ramos de la Fiesta de la Regalina" y les "rapas" especialidá l.luarquina de bollu preñáu.

La cita col Padre Galo inclúi güei sábadu a les siete la llectura de poemes en cementeriu y darréu, el fallu del concursu de poemes n'asturianu que tolos años entrega "La Regalina".

Too ello na viéspora de la Fiesta de la Regalina,que'l mesmu Padre Galo recuperó en 1932 y que tien continuidá hasta güei, meciéndose la tradición relixosa cola cultura y la llingua asturiana, anque ello va ser pal últimu fin de selmana d'agostu.