La izquierda soberanista reivindicó esti 8 de setiembre “qu’otra Asturies non sólo ye posible, sinón que ye imprescindible”

|

Les cais del centru d'Uviéu enllenárose de banderes d’Asturies nel Día de la Nación Asturiana. La izquierda soberanista entamó una marcha xunitaria baxo’l lema ‘Pa tresformar Asturies: #LluchandoPolaSoberanía’ que finó con una xinta popular y xuegos tradicionales na plaza’l Paragües.

Dalgo más de 300 persones acudieron a la manifestación coordinada pol Espaciu La Llegra y organizada al traviés d’asamblees abiertes nes que participaron organizaciones y persones a títulu individual de la izquierda soberanista col oxetivu de dar continuidá a la iniciativa #LluchandoPolaSoberanía. Portaron baberu propiu la Plataforma Feminista d’Asturies, Iniciativa Comunista d’Asturies y los trabayadores del Mataderu Central, en representación de les Asamblees de Trabayadores en Llucha, y sofitaron la marcha Compromisu por Asturies, Conceyu Abiertu, Andecha Astur, Darréu, Asamblea de Para@s y Precari@s d’Asturies, Comité Asturianu de Solidaridá cola Ucrania Antifacista, Corriente Sindical d’Izquierda y Xunta Estudiantil Asturiana.

Avanzada les 12.30 hores salió la marcha del Paséu los Álamos destín a la Escandalera, onde se facía la primer de les cuatro paraes previstes mientres la marcha pa dar la voz a dellos coleutivos sociales en cuatro bloques: llaboral y derechos sociales, mocedá y educación, xéneru y llibertaes sexuales, y ecoloxismu y mundu rural. Un trabayador del Mataderu Central, anguaño n’asamblea permanente, esplicó a los presentes la situación actual de los emplegaos, animó a que “nengún sindicatu decida’l futuru nuesu” y afirmó que nun se pue permitir “nin un despidu nin un zarru más n’Asturies”. El siguiente paru foi frente al edificiu históricu de la Universidá d’Uviéu, onde representantes de la Xunta Estudiantil Asturiana y Darréu criticaron’l modelu nuevu d’universidá, “al serviciu de les élites”, asina como los recortes, la LOMCE y la represión llingüística. Tamién afondaron na situación precaria de los maestros de Llingua Asturiana y Gallego-asturiano y denunciaron “la emigración forciada” a la que se ve obligada la mocedá asturiano al tiempu que reivindicaron “un futuru dignu” a algamar al traviés de la soberanía.

Na plaza de la Casa Conceyu tocó’l turnu del bloque de xéneru y llibertaes sexuales, pa lo que tomaron la voz miembres de la Plataforma Feminista d’Asturies. Éstes criticaron el sistema patriarcal y “les polítiques misóxenes del PP”, poniendo’l focu na Llei del Albuertu “basada n’opiniones relixoses y privaes”. Yá na plaza’l Sol, garró la pallabra Moisés Cima, de La Llegra y Xeira, qu’afondó na situación del ecoloxismu y del mundu rural con un discursu n’eonaviego. Nél criticó la situación na que s’atopen ganadores y xente de la mar, y denunció l’éxodu rural y l’escaezu que viven les fasteres occidental y oriental del país. “Véndennos Asturies como un paraísu natural, pero tienen un modelu que pasa por desaniciar los nuesos recursos natural” pa beneficios privaos, afirmó enantes de defender, por último, la soberanía alimentaria.

Actu políticu, bolos y xuegos tradicionales

La parada cabera yera la plaza’l Paragües, onde Adrián Calvillo y Diana Jäkel lleeron el manifiestu de la manifestación robláu por toles organizaciones que participaron na marcha. “Un nuevu 8 de setiembre, el Gobiernu asturianu organiza una retafila d’actos institucionales que nun faen otra cosa qu’afondar na so propia promoción, na autocomplacencia y nel espardimientu de rellatos falsos, como’l Cuadongismu. Ante ello asítiase un pueblu asturianu que nun tien nada que celebrar y sí muncho que reivindicar”, principiaron pa depués tratar “la crisis permanente que carecemos dende va décades, col solapamientu de distintes crisis ensin resolver dende la ‘reconversión industrial’, que nun supuxo otra cosa que la desindustrialización del país yá’l desmantelamientu de seutores como la minería, el naval, la siderurxa o estayes con un pesu tradicionalmente perimportante, como la pesca, l’agricultura o la ganadería”, lo que supunxo la perda “de decenes de miles de puestu de trabayu nun procesu desendolcáu a midida de los intereses del poder económicu capitalista al traviés de ferramientes gubernamentales supraestatales (Xunión Europes, FMI…), estatales (Estáu español) y d’un Gobiernu asturianu asitiáu nel más fonderu sucursalismu”.

La falta d’emplegu ye la principal manifestación d’esta crisis, con más de 95.000 paraos nel país, con especial incidencia na mocedá y ente les muyeres, ensin escaecer la precariedá qu’ufre anguaño’l mercáu llaboral. Como consecuencia direuta d’esta situación ta “el grave problema de la emigración” y l’avieyamientu de la población. Otros temes nel qu’afondaron los convocantes ye l’aculturización que vive’l país y la marxinación llingüística, asina como la “esplotación xabaz de los recursos naturales”, asuntos de los que culpen, al igual que nos casos anteriores, a toles fuercies de la Xunta Xeneral. “El Gobienu del ‘Principado’ amuésase como lo que ye: una ferramienta ayena a los intereses de les clases populares del nuesu país”, afirmaron.

La solución a esta situación ye, na so opinión, “l’articulación d’una rempuesta popular en clave asturiana”, col oxetivu de que “seya’l pueblu quien tenga’l mandu de la economía, de los recursos naturales, de les polítiques sociales a desarrollar, de cómo rellacionanos con otros pueblos: en definitiva, pa siguir caminando na construcción de la nuesa soberanía”. “Otra Asturies non sólo ye posible, sinón que ye imprescindible”, finaron la intervención.

Tres l’actu políticu, un grupu de manifestantes averóse al ‘Gerhotel Los Robles’ pa protestar pol despidu d’un trabayador y principió la xinta popular na plaza’l Paragües, onde taben colocaos un puestín con llibros de Trabe y Suburbia Ediciones, asina como de material. A lo llargo de la tarde desendolcáronse nel llugar xuegos tradicionales y cuentacuentos pa neños nun ambiente festivu.

Contador Estadistiques