60.000 families pidieron ayudes pa mercar llibros escolares

Cerca de 60.000 families asturianes pidieron yá ayudes pa mercar los llibros de testu escolares pal cursu que ta pa entamar, acordies colos datos qu'apurrió ayeri'l director de Recursos Humanos de la Conseyería d'Educación, Arturo Verano. El responsable d'Educación comentó que les solicitúes van estudiase pa ver si merecen l'ayuda y defendió'l sistema de subvenciones pa mercar llibros como meyor que'l sistema d'empréstamu de los mesmos que se fai n'otres comunidaes en cuantes qu'a les families nun-yos presta pol desgaste del material que lleva arreyáu'l sistema d'empréstamu y porque amás los llibros escolares modernos inxerten fiches pa facer qu'inutilicen el llibru pa un segundu usu.

El Gobiernu asturianu va dar ayudes directes a les families por cada fíu que tengan n'edá de dir a la escuela, lo mesmo dientro de los centros públicos que nos concertaos, anque non nos particulares. L'importe de les ayudes va ser de 90 euros en primaria y 130 en Secundaria, siempre que la unidá familiar nun ingrese más de 60.000 euros al añu. Gobiernu asturianu y Ministeriu d'Educación tienen acutaos 7 millones d'euros pa financiar la midida.

Responsables de programes asturianos d'intercambiu de llibros criticaron l'alternativa escoyida pol Gobiernu asturianu y calificaron de "marafundiu de fondos públicos" la subvención directa y ensin baremos de renta pa l'alquisición de los llibros, al empar que sorrayaron que la midida nun supón la gratuidá real de los llibros d'enseñanza, como se publicitó dende instancies oficiales.