5 tonelaes de galipote en 72 hores

El Ministeriu de Fomentu ta acabante de facer una anuncia oficial sobre'l Prestige na que rescampla que'l galipote del petroleru accidentáu ta llegando a la costa asturiana en mayor cantidá que hasta va pocos díes. Fomentu diz que'l retén de recoyida de galipote que tien funcionando na mar lleva pañaes en 72 hores cinco tonelaes de fuel-oil del petroleru siniestráu. Asina, el domingu sacáronse 1.385 kilos, el llunes 1.775 y ayeri martes 1.800 kilos, lo que fai un total de 4.960 kilos en tres díes, medrando cada día del domingu p'acá la cantidá de galipote. Según Fomentu, agora mesmo hai un total de 23 playes afectaes pol galipote, seyes menos que'l llunes y toes elles nos conceyos de Ribedeva, Llanes, Villaviciosa, Gozón, Castrillón, Muros, Cuideiru, Tapia y Castropol.

Fomentu diz que les manches que tan llegando llevaben enfrente la costa asturiana dende avientu, y que'l vientu que del Norte d'estos díes ye'l que ta allegándoles pa contra la costa, faciendo una ñube de "galletes" mui sueltes que va dende'l Cabu Peñes hasta Llastres.

El Ministeriu tien trabayando atropando galipote a cinco barcos de la Sociedá Estatal de Salvamentu Marítimu, que son el Salvamar Rigel, Algol, Capella, Sisup y la embarcación ausiliar del remolcador "Alonso de Chaves". Mientres, el retén de personal de tierra consta de 432 persones, que se dixebren nun bloque de 100 operarios contrataos pola empresa estatal Tragsa y otru de 332 persones apuntaes al paro y que trabayen con contratu del ayuntamientu del conceyu en que-yos correspuende llimpiar.