422 científicos quéxense del Gobiernu pol tema del Prestige

La otra selmana, la polémica poles responsabilidaes na catástrofe del Prestige llegó a una de les revistes internacionales de más prestixu y espardimientu ente la comunidá científica. Un manifiestu cola firma de 422 científicos vieno a echar más penriba del Gobiernu del estáu pola manera en que llevó l'accidente del petroleru. Los que firmen el documentu, científicos marinos y atmosféricos, miembros del Institutu Español d'Oceanografía, del Conseyu Superior d'Investigaciones Científiques (CSIC), universidaes y otros centros d'investigación, denuncien que'l gobiernu xustificare tolo que fexo argumentando que les decisiones faciénse l'alcuerdu "colos científicos" sobremanera la polémica decisión d'apartar el barcu de la costa, que, como bien se sabe, valió pa esparder más la carga cuando la nave fundió. La carta espublizada en Science quier espresar lo que pa los científicos ye una falta mui grave de xestión del conocimientu, acusando al gobiernu non de les decisiones que tomó, sinon de la falta de comunicación que tuvo colos especialistes y de querer xustificase depués tomando'l nome d'ellos, cuando en realidá nun foi asina.Ente los 422 que firmen la carta hai dellos científicos que trabayen pa entidaes asturianes. Asina, na llista apaecen los profesores de bioloxía de la Universidá d'Uviéu Rafael González-Quirós, Jose Luis Acuña, David Álvarez, Florentina Álvarez-Marqués, Ricardo Anadón, y Julio Arrontes, mientres que del centru asturianu del Institutu Oceanográficu firma Xosé Anxelu G. Morán.