400.000 llitros de sidra con denominación

La segunda collecha de sidra con denominación d'orixe y la primera que sal cola denominación reconocida por Bruseles nota la vecería y pon en mercáu menos que la metada de producción que lo del 2004.

Los 38 llagares enxertos na marca punxeron en mercáu nel 2004 un millón de llitros, una cantidá que mengüó anguaño hasta los 400.000 llitros por causa de la vecería de los pomares asturianos, que producen n'años alternos. La presentación de la campaña 2005 de sidra con denominación féxose na sede nueva del Conseyu Regulador de la Denominación d'Orixe, que s'asitia nel antiguu conventu de San Xuan, en Villaviciosa, un edificiu del siglo XVIII que se remocicó gracies al llabor d'una escuela taller. Al actu asistió'l Presidente del Gobiernu asturianu Vicente Álvarez Areces, que dio anuncia del aniciu d'una campaña de promoción empobinada específicamente a la sidra de denominación. El diputáu popular Luis Peláez asistió tamién al actu y retrucó les palabres d'Areces afirmando que ye preciso un mayor compromisu del Gobiernu pa llevar alantre les posibilidaes del sector. El Presidente del Conseyu Regulador, José cardín, xerente tamién de Sidra "El Gaitero" retrucó les palabres de Pelaez y remembró-y que de tener puestu más enfotu'l PP na llexislatura que gobernó Asturies, l'afitamientu de la sidra de denominación diba tar agora nuna fase uncho más avanzada.

La Sidra de denominación d'Orixe nun ye la única sidra con una etiqueta de calidá en mercáu, nin tampoco la primera n'apaecer. Esti añu presentárase la IV collecha de sidra de "mazana seleccionao d'Asturies" una marca que se creo gracies a la iniciativa particular de llagareros y cosecheros de mazana de sidra como una solución transitoria énte'l retrasu na creación de la Denominación d'Orixe y tamién como una marca de calidá que defendiere la producción autóctono contra la invasión de mazana de fuera de baxu preciu y calidá. Foncueva, Trabanco, Muñiz y La Nozala, a los que s'amestaron nel 2004 Peñón y Sopeña son los seyes llagares que-yos ufierten a los sos veceros esta sidra ellaborao con mazana asturiana dafechu de les 22 variedaes reconocíes tamién na D.O. y producío poles pomaraes enxertes n'asociación AACOMASI La coesistencia de les dos "marques" en mercáu pue caltenese nun futuru, en cuantes que nun se prevé qu'esta marca de calidá auditada por una empresa independiente s'enxerte na denominación d'orixe. La denominación recibió amás crítiques de dellos llagareros nes últimes xornaes de la sidra que se celebraron esti branu en Nava y qu'acusaron que la denominación un tien ventana de mercáu n'Asturies.