350.000 hectárees amenazaes pola motosierra

La Coordinadora Ecoloxista d'Asturies denunció ayeri que la Llei Forestal d'Asturies acabante d'aprebar pola Xunta Xeneral del Principáu nun pon torga nenguna a les cortes masives de madera. Según les cuentes de la organización que representa Fruti Pontigo, cerca del 70% de la superficie arbolao d'Asturies, sobre 350.000 hectárees, peligra énte la llegada d'una llei que, al paecer de los conservacionistes, "respuende a les presiones del sector empresarial de la madera"

Una de les crítiques más fuertes de los ecoloxistes ye a les cortes indiscriminaes de superficie forestal, que consiente coles cortes masives que desanicien tolos árboles nuna superficie entera de miles de metros cuadraos, un sistema de corta que ta prohibíu en países de la nuestra rodiada, onde les cortes fáense siempre dexando una tantu por cientu d'árboles que caltengan la estabilidá biolóxica de la faza y que tengan pol suelu

Los ecoloxistes llamenten que les cortes masives y indiscriminaes tendríen sobre l'ecosistema efectos mui gafos, entamando pola perda de biodiversidá na vexetación y tamién na fauna, ello aparte del efectu sobre'l clima local que tien la perda de la función reguladora del calor y la humedá que tien la viesca. Esti efectu, y la xuba de la radiación que pega directamente en suelu tamién puen llevar efectos secundarios como la ruina de dellos suelos y tamién, en faltando l'aguante que dan los raigones, l'apaición d'argayos.

Les previsiones más pesimistes de la Coordinadora pinten un escenariu nel que, de llevase alantre la corta d'estes 350.000 hectárees, la recuperación llevaría décades.