‘1984’ d’Orwell tamién va poder xugase n’asturianu

|
Interrogatoriu '1984 Thoughtcrime'

Un xuegu de rol basáu na icónica novela ‘1984’ de George Orwell va asoleyase próximamente n’asturianu y castellanu, cola intención de contar con una versión tamién n'inglés. Ediciones Radagast, depués del ésitu algamú con ‘Depués d’ochobre’, apuesta agora por esti ‘survival sicolóxicu’ desendolcáu xunto colos herederos del escritor británicu.

‘1984: Thoughtcrime’ va ser el nome d’esti xuegu, oficial del llibru, que se va financiar con una campaña de micromecenalgu na rede en Verkami. Ésta entovía nun arrancó, pero yá tien espublizáu un videu promocional.

“Trátase d’un xuegu de rol ‘survival sicolóxicu’ nel que los xugadores van ponese na piel de ciudadanos de la Oceanía distópica de George Orwell qu’han sobrevivir a una dictadura tarrecible y implacable dominada pol Hermanu Grande na que tolos documentos escritos manipúlense con procuru y a los ciudadanos vixílenlos con cámares de contino”, espliquen dende la editorial. “Van tener mieu de les patrulles de la policía, van tapecer los sos pensamientos de la terrible Policía del Pensamientu, van intentar facer malabarismos mentales pa creyer la propaganda y que nun sospechen d’ellos y hasta van emplegar la nuevafala, una variación de la llingua creada pol Partíu pa llimitar el pensamientu astrautu y controlar meyor el pensamientu de los ciudadanos”, añaden.

Los personaxes, en cuenta de facese colos típicos puntos d’esperiencia, van algamar alcordances. D’esta manera, les esperiencies que vivieron los protagonistes puen condicionalos y da-yos una serie de ventayes o camudar les sos carauterístiques faciéndolos más o menos áxiles, sociales o intelixentes.

No que cinca la nuevafala, desendolcóse una adautación cola que ye posible xugar si se quier. Son una serie de regles, afitaes gracies a la participación de filólogos de delles llingües, qu’adauten la gramática del castellanu, del asturianu y del inglés pa que pueda ser emplegada de mou intuitivu y, al empar, que faiga difícil el comunicar idees complexes.

Trés aventures

El llibru, de 132 páxines tamañu foliu a tou color, inclui non namás les regles básiques pa xugar sinón, tamién, un compendiu d’información exhaustiva sobre la dictadura del Gran Hermano amás de trés aventures que puen facer los xugadores. Nuna delles va ser posible xugar como personaxes secundarios de la novela; n’otra, han ponese na piel de neños cola cabeza absorbida pola propaganda; y na tercera van ser ‘proles’, los ciudadanos más llibres pero tamién los más probes de la dictadura distópica.

El xuegu va salir a la venta a un preciu d’unos 35 euros, pero les persones que se faigan con él de manera adelantada van poder mercalu por 30. Con ‘Depués d’ochobre’, Radagast llegó a algamar 12.000 euros na campaña entamada na rede.

D’esta forma, ‘1984’, que se pue lleer n’asturianu gracies a la torna fecha por Xesús González Rato pa la coleición ‘Calume’ d’Ediciones Trabe, tamién va poder xugase na nuesa llingua cola adautación a xuegu de rol ‘1984: Thoughtcrime’.

Na imaxe, dibuxu del xuegu que representa un interrogatoriu.

Contador Estadistiques