120 minutos que valen una semifinal

Partíu típicu d'eliminatoria'l que se xugó ayeri nel Tartiere y nel que Uviéu y Calahorra disputaben el pase a la semifinal de la Copa Federación. A la fin, l'Uviéu foi quien a sacar alantre la situación con prórroga incluyida gracies a les ganes que-y punxo al partíu y tamién porque al so rival d'ayeri pesó-y enforma la presión que supón xugar nel Tartiere

Rivas sorprendió otra vuelta cola alliniación y l'esquema que presentó, un apueste dafechamente ofensivu que tuvo qu'esperar pol premiu hasta la prórroga. Esti apueste pol ataque dio llugar a abondes ocasiones que nun se concretaron hasta'l minutu 16 dempués d'una falta, nuna riestra rechaces dientro l'área que terminó a los pies de Lluismi, qu'acertó a batir al meta calagurritán. Siguió l'equipu azul imponiendo un ritmu altísimu al partíu, pero la falta de puntería nun-yos permitió llegar al descansu cola eliminatoria resuelta. Asina vinieron ocasiones de Cervero, Rubén y sobremanera de Darío qu'ayeri fizo ún de los sos meyores partíos nesti añu

Tuvo qu'esperar l'afición azul hasta'l minutu 26 del segundo tiempu pa celebrar l'empate na eliminatoria. Darío a pase de Yeray marcaba'l 2-0 y dába-y al so equipu tiempu pa resolver la eliminatoria enantes de llegar a la prórroga. Tuvo Darío la ocasión más clara pa esto nel minutu 31, pero tres un pase Ruben que superó al porteru mandó'l pelotu al poste cuando la portería taba vacía. D'equí al final l'Uviéu acusó l'esfuerzu del partíu y pegó un baxón físicu ablucante, aguantando pa llegar a la prórroga y gracies...

L'Uviéu taba dau físicamente pero víase que yera l'únicu equipu del campu que quería y creyía na victoria. El gol que decidió la eliminatoria marcólu otra vuelta Dario, que tres d'un gran control dientro l'área sacó un tiru ante'l que nada nun pudo facer Atienza. Quedaba-y munchu tiempu y poca fuercia al Uviéu, pero la falta d'ambición del Calahorra y la xusta expulsión de David nel minutu 108 sirviéron-y al Uviéu p'algamar les semifinales d'esta Copa Federación. Bona ya intensa nueche de fútbol que tien de servir a equipu y afición p'aclariar duldes de lo que se pue facer nuna eliminatoria a doble partíu