100 años de l'ascensu al Urriellu

Yera la una y cuartu d'un 5 d'agostu de 1904, cuando dos paisanos columbraben los Picos d'au denyuri lo fixere nadie, el cume del Picu Urriellu. Estos dos montañeros de primeros de sieglu yeren Pedro Pidal y Gregorio Pérez. El primeru, xixonés de 35 años, yera'l Marqués de Villaviciosa, y l'otru un paisanu de Caín que pasó a la historia como "El Cainejo". Los dos xuntos fixeron posible lo que paecía imposible: llegar hasta onde los robecos nun puen subir, escribiendo asina la primera páxina del alpinismu asturianu y axuntando los sos nomes pa siempre col del Picu.

La xubida nun se fizo al debalu nin de casualidá. Pedro Pidal yera un bon conocedor de los Picos onde diba a cazar davezu, amás d'un gran "deportista" según la idea de la época, como demuestra'l fechu de que visitando la Esposición Mundial de París en 1900, participare nos Xuegos Olímpicos quedando segundu nuna modalidá de tiru con arcu, y capítulu aparte merez la so faceta de políticu creador y impulsor de los Parques Nacionales n'España, como'l de Cuadonga, un de los primeros del mundu.

Daquella xeólogos europeos como'l conde de Saint-Saud esploraben y estudiaben los Picos d'Europa, venceyando los sos nomes a cada picu qu'esguilaben por primer vegada. Estes visites d'alpinistes europeos foron les que decidieron a Pedro Pidal a entamar la esguilada, pa impidir que fueren montañeros foriatos los primeros en pisar el cume del picu más "emblemáticu" de los nuestros montes.

La preparación foi llarga. Nel branu de 1903 Pidal estudia'l Picu a la gueta d'una posible vía pela que xubir, y dempués de camentar muncho nello decide que pue intentase pela cara norte, descartando les cares sur, este y oeste. Nel 1904 Pidal viaxa a Llondres a mercar la meyor cuerda qu'alcuentra y entama darréu en Chamonix un abegosu entrenamientu xubiendo al difícil cume del Dru.

Sintiéndose yá preparáu, Pidal empobínase a Los Picos onde contacta a quien lu tendrá qu'acompañar nesta empresa. Gregorio Pérez yera un home fuerte, bon conocedor de la zona y desenvolvíase con gran facilidá per llambries y peñes. Xuntos igüen una cordada con posibilidá d'algamar l'ésitu.

Asina, naquel agostu de 1905 entamen la xubida pela cara norte. Gregorio va descalzu pa tener meyor agarre cola piedra, mientres que Pidal quier mas dir d'alpargates. Xuncíos cola cuerda van ganando metros, pero lleguen pasos difíciles y vense obligaos a facer maniobres peligroses, como cuando'l Cainejo tien de montar al llombu de Pidal, que lu emburria p'arriba hasta qu'algama un agarraderu dende'l que Gregorio xube pela cuerda a Pidal. Dempués de repetir dos vegaes esta maniobra, les dificultaes son menores y ya nos caberos metros quiten les cuerdes hasta llegar al cume del Urriellu, onde disfruten del momentu de gloria. Pidal dexó ellí una tarxeta pa quien viniere dempués

Sicasí, quedaba baxar y esto yera más difícil qu'esguilar, tanto qu'un cachu de la cuerda quedó na paré nun de los tramos mas difíciles, siendo en 1916 que Victor Martinez pasó per ellí,rescatando la maroma y devolviéndo-yla al Marqués. A les siete de la tarde, El Cainejo y El Marqués llegaben abaxo.

Pedro Pidal y Gregorio Pérez foron los primeros, pero… ¿y dempués?. Nadie nun volvió al Urriellu hasta'l branu de 1906 cuando l'alpinista y xeólogu bávaru Gustavu Schulze llegó a los Picos. Conocedor de l'ascensión de Pidal y Gregorio, l'alemán decide repetila en solitario. Xube partiendo de la mesma vía pero varía'l so trazáu buscando una esguilada más amañosa a les sos facultaes, tardando trés hores en llegar al cume. P'amiyar alcuentra meyor la cara sur y na baxada emplega clavos por primera vegada en Picos.

Naturalmente estes dos primeres ascensiones fueron polémiques, ya que della xente siguía pensando que yera imposible xubir, sobremanera nel casu de Schulze en solitario, teniéndose los primeros meses la historia de Schulze por falsa dafechu, pero ello foi qu'en xunetu de 1907 alcontráronse n'Unquera, Pedro Pidal, Schulze y el conde de Saint-Saud, quien foi testigu nuna cena onde los dos primeros intercambiaron anécdotes de la subida y na que, como preba final qu'acabó con toles duldes, Schulze entregó-y a Pidal la tarxeta de visita que dexare nel cume.

A estes primeres llinies del Picu siguiéronles munches otres escrites por xente como Victor Martinez, Rabada y Navarro, los "murcianos", y una llarga llista d'alpinistes que dieron lo meyor d'ellos, en dellos casos la vida, pa que'l Picu siga siendo referente y oxetivu de cientos d'alpinistes anguaño, cien años dempués.