10 asturianos muerren tolos díes por causa del tabacu

Nel Día Mundial ensin Tabacu, l'asociación asturiana de médicos especialistes en patoloxía respiratoria Asturpar declaró qu'Asturies ye la comunidá onde se rexistren más muertes por enfermedaes isquémiques del corazón, cáncanu nos bronquios y enfermedaes cróniques de les víes respiratories en tol estáu.

Acordies coles cuentes d'Asturpar, el tabacu ye la causa de la muerte de diez asturianos al día y de 3.700 al añu, una estadística que vien repitiéndose dende primeros de la década de los 90. De cada diez muertos pol tabacu, nueve son fumadores activos y ún pasivu, doblando les muertes por tabacu n'Asturies a les que causen los accidentes de tráficu y llaborales. L'asociación profesional sorrayó'l fechu de que, dende la entrada de la llexislación nueva sobre tabacu, conseñóse una xuba de les demandes d'ayuda pa dexar el tabacu nes unidaes especializaes de la sanidá pública.

Los responsables d'Asturpar declararon nun tener clares les causes de qu'Asturies sía la comunidá con más muertes pol tabacu, anque l'alta edá media de la población o la presencia d'otros vezos dañibles pa la salú como l'altu gastu d'alcohol, la falta d'actividá físico o la mala alimentación podríen tener influyencia nello. Amás de la concienciación, los médicos d'Asturpar piden que se financien los tratamientos antitabacu y que se creen unidaes d'ayuda na sanidá pública dotaes de medios especializaos.