“Tenemos el deber d’esparder y de caltener el significáu de la obra de Pachin de Melás”, afirma Pandiella

Iniciativa pol Asturianu y Ástura entamaron el vienres un homenaxe a Pachín de Melás, fináu hai agora 75 años. “Tenemos el deber d’esparder y de caltener el significáu de la obra de Pachin de Melás”, afirmó Xuan Pandiella.

El representante d’Ástura, organización en defensa de la promoción, el fomentu, la dignificación y la defensa de la llingua, la cultura y la identidá asturiana que ta dando los sos primeros pasos, foi l’encargáu de lleer el discursu qu’abría un actu d’homenaxe nel qu’escritores y personalidaes de la sociedá asturiana lleeron testos d’Emilio Robles Muñiz ‘Pachín de Melás’. Nel salón d’actos del Atenéu Obreru acudió tamién la so única fía viva, Pilar, que tuvo acompañada d’Ángeles, la so fía y nieta del escritor nacíu en Baxo Villa, onde anguaño tán les cais Contracai y Melquiades Álvarez. Dambes recibieron de los organizadores un ramu de flores.

Na so intervención, Pandiella, que tuvo acompañáu por Inaciu Galán, presidente d’Iniciativa pol Asturianu, recordó la emotividá d’esti actu d’alcordanza que n’años anteriores tenía como sede lo que queda de la cárcel d’El Coto, llugar onde morrió Pachín de Melás hai 75 años. “La figura, la vida y la obra d'Emilio Robles Muñiz tien que ser un conocimientu básicu que tendríemos que tener presente tolos díes del añu”, afirmó’l representante d’Ásturia sobre l’escritor, “una persona reconocida na ciudá” que se convirtió al mesmu tiempu “nun intelectu del resurdimientu rexonalista ya intelectual d'Asturies”. “Ye mui importante ya necesario remarcar tol llabor que fizo Emilio Robles Muñiz en defensa d'un Estatutu d'Autonomía p'Asturies qu’al final, por desgracia, nun llegó a esistir”, añadió.

Tres lleer el testu ‘Alma asturiana’, nel que reflexa la tristura y la pena –que tamién apaez n’otres obres del autor– sobre la desapaición que taba viviendo na so época la cultura tradicional d’Asturies, Pandiella fixo una crítica a los dirixentes políticos que “amparaos nun supuestu ‘progresismu’ tolos díes llaboren pa que la cultura, la llingua y la identidá propia del país vayan desapaeciendo, faciendo que les nueses señes d’identidá pasen a convertise en dalgo marginal”. Darréu, destacó’l ciñu que tenía Pachín de Melás a Gaspar Melchor de Xovellanos y a la so trayeutoria, llabor y amor pola nuesa cultura –encargóse por cuenta propia, en tiempos de la Guerra Civil, de buscar un sitiu pa protexer los restos del prócer xixonés– y unvió un mensaxe a “toos aquellos que presumen de ‘progresismu’ y al mesmu tiempo arrequexen a los falantes d’asturianu y reprimen unos derechos llingüísticos, faciendo, por ciertu, un difícil binomiu”: “‘progresismu’ nun ye lo universal o mayoritario, nin la destrucción de lo propio. Lo universal ye’l reconocimientu de la diferencia y diversidá de cultures, pueblos y llingues que por suerte hai nel mundiu. Una llingua como l’asturianu, cola considerable obra lliteraria que tien, hai que conservala porque ye l’acervu, la pertenencia, el legáu más importante que tenemos y nun se puede destruir, nin escaecer, nin abandonar de nenguna manera”.

Pa terminar, afirmó que “nosotros como asturianos y más como nel mio casu, como xente mozo, tenemos el deber d’esparder y de caltener el significáu de la obra de Pachín de Melás pal disfrute de les xeneraciones vinientes”. “En cuenta de facer la guerra, trabayemos pa esborriar el desconocimientu y la inorancia de la obra y la figura de Pachín de Melás pa nel futuru nun ser extranxeros nel nuesu propiu país. Mantengamos esi amor a Asturies qu’él predicaba y mantengamos viva la obra d’Emilio Robles Muñiz”, finó Pandiella faciendo referencia a les pallabres de Xovellanos nes que señalaba qu'había que facer la guerra a la inorancia y al desconocimientu.

“Un bon paisanu y un bon padre”

Tres la llectura del discursu, Galán procedió a dar pasu a delles persones que queríen participar nel actu d’alcordanza lleendo dalgún testu del escritor xixonés. Asina, garraron el micrófonu Sabel Tuñón, Xelu Neira, el propiu Galán, Javier Cubero, Monchu Iglesias y Pandiella, finando l’actu con unes pallabres de la fía de Pachín de Melás. Pilar, de 92 años, que llegó a emocionase de manera especial mientres la llectura de la carta última del autor a la so muyer Agapita, escrita dende la cárcel d’El Coto, faló sobre la figura del so pa y contó dellos recuerdos que caltién na so mente. “De carauter yera socarrón; gustaben-y muncho les bromes. Yera mui cariñosu con toos y yera un bon paisanu y bon padre”, afirmó Pilar, que recordó l’error que cometen dalgunos medios de comunicación al situar el llugar de nacimientu del so pá: “nació en Baxo Villa”, confirmó. Tamién puntualizó detalles sobre los fechos del treslláu de los restos de Xovellanos. “Él foi direutu al Ayuntamientu pa falar con Avelino González Mallada, que d’aquella yera l’alcalde, sobre esti asuntu”, recordó.

Pa finar l’actu, los organizadores fixeron un llamáu a les instituciones “pa que faigan dalgo pa recordar la figura de Pachín de Melás. Tien una cai y dedicóse un añu la Selmana de les Lletres, pero nun ye suficiente”.

Na semeya, Pandiella, Pilar, Ángeles y Galán.