“Sorpresa y malestar” en Podemos polos recortes a les ayudes a empreses informatives n’asturianu

Reclama que los 80.000 euros presupuestaos esti añu se repartan “ente medios de comunicación que fagan un apueste claru pola visualización del asturianu”

El grupu parllamentariu de Podemos Asturies asoleyó ayeri un comunicáu nel que tacha de “impresentable’l recorte a los medios de comunicación n’asturianu decretáu pol Gobiernu socialista”. Pa esti 2015 les subvenciones pa la normalización de la llingua asturiana y gallego-asturiano sufren un retayu del 37 por cientu al pasar de 127.000 euros a 80.000; y de más de la metá en comparanza con hai dos años, cuando la Conseyería d’Educación, Cultura y Deporte dedicó 168.000 euros a esti apartáu.

“Esti tisoriazu inda ye más grave si se tien en cuenta que’l sector de los medios de comunicación ye ún de los más perxudicaos pola crisis económica”, recuerda Podemos, que diz nun sorprendese “porque ye la manera na que vien actuando la FSA nesta materia nos últimos años”. Sicasí, llamenta que “la midida se lleve alantre depués de que nos alcuerdos alcanzaos na investidura ente IX y PSOE ún de los puntos anunciaos ye potenciar los medios de comunicación n’asturianu y gallego-asturiano y la política llingüística”.

Podemos considera “impresentable y preocupante qu’una vez más se recorten les partíes que yá de por sí son mui escases, ensin nenguna xustificación y más cuando na Xunta Xeneral del Principáu nel caberu mes s’acaba de perder una oportunidá pa reducir les partíes que los grupos parllamentarios reciben. Nesi sentíu, vamos tar mui sollertes con estos ataques, y otros que puedan venir, a la promoción del asturianu nos medios de comunicación y que nun faen más que debilitar entá más una posible recuperación de la nuestra llingua”. D’igual forma, reclama que, “yá que la partida final va cuntar namás con una cantidá de 80.000 euros, esi dineru sía repartío ente medios de comunicación que fagan un apueste claru pola visualización del asturianu”.

Carta a Pedro Sánchez

La diputada de Podemos Lucía Montejo entregó’l sábadu al secretariu xeneral del PSOE, Pedro Sánchez, mientres l’actu d’investidura de Javier Fernández, una carta d’una naveta votante socialista que critica la postura de la FSA-PSOE pa col asturianu y na que-y solicita que medie pa que la so organización n’Asturies defenda los derechos de los falantes d’asturianu cola declaración d'oficialidá.

Iniciativa pol Asturianu encamienta a la conseyería “a rectificar”

Inaciu Galán, presidente d’Iniciativa pol Asturianu, calificó los recortes nuevos vivíos nes ayudes a medios de comunicación n’asturianu de “fechu llamentable”qu'espeya “la falta de compromisu llingüísticu que yá se veía recoyíu nel pactu d'investidura”. Encamienta a la conseyería a rectificar y critica que l’Executivu nuevu entame la llexislatura “queriendo acabar con tolos espacios de normalidá”.