“El 8 de setiembre nun hai muncho que celebrar y sí muncho que reivindicar”, apunten dende l'Espaciu La Llegra

|

La izquierda soberanista va salir a la cai de forma conxunta’l llunes, 8 de setiembre, con motivu del Día de la Nación Asturiana. “Nun hai muncho que celebrar y sí muncho que reivindicar”, señalen dende l’Espaciu La Llegra, responsable de coordinar la manifestación prevista n’Uviéu y los actos posteriores na plaza’l Paragües.

Xicu Ariza, Nuria García Álvarez y Nacho González Fernández, acompañaos de dellos compañeros, encargáronse d’anunciar los detalles d’esta cita organizada al traviés d’asamblees abiertes nel que participaron organizaciones y persones a títulu individual de la izquierda soberanista. Asina, la iniciativa entamada pol Espaciu La Llegra cuenta col sofitu de Compromisu por Asturies, Conceyu Abiertu, Darréu, Iniciativa Comunista d’Asturies, Asamblea de Para@s y Precari@s d’Asturies, Comité Asturianu de Solidaridá cola Ucrania Antifacista, Corriente Sindical d’Izquierda, Plataforma Feminista d’Asturies y Xunta Estudiantil Asturiana.

“Decidimos salir a la cai porque’l Gobiernu asturianu celebra un 8 de setiembre d’autopropaganda y autoconsumu, vendiendo una imaxe d’Asturies falsa y ficticia, y nós creemos que nun hai munchu que celebrar y sí muncho que reivindicar”, apuntó Ariza. Ente les reivindicaciones pa esta xornada ta’l derechu “a poder decidir y dar respuesta a les imposiciones que nos vienen marcaes dende’l Fondu Monetariu Internacional, la Xunión Europea y l’Estáu español, como los retayos, reformes como la ‘Gallardón’ o la LOMCE, que nos afeuten equí n’Asturies”. Tamién contra’l desmantelamientu industrial y l’afogamientu del texíu productivu del país “que tien como reflexu la emigración forciada de miles de mozos y moces asturianes tolos años”, continuó Ariza, que nun quixo escaecer la situación del mundu rural asturianu y el despoblamientu que vive.

El mediu ambiente ye otru de los campos onde los convocantes quieren poner el focu, “yá que tán esfarrapando Asturies pa beneficiu y intereses d’empreses privaes”, asina como nes “polítiques aculturizadores” del Gobiernu “que reprimen los derechos llingüístiques y culturales” o la razón de xéneru. “Por toes estes razones, pa que seya’l pueblu asturianu’l que toma la pallabra y tengamos nós la capacidá de decidir qué modelu económicu queremos, qué facer colos nuesos recursos naturales o cómo rellacionanos con otros pueblos del mundu, salimos a la cai esti 8 de setiembre”, finó Ariza.

Manifestación ‘Pa tresformar Asturies: #LluchandoPolaSoberanía’

La xornada del llunes va principiar a les 12.30 hores cola manifestación Pa tresformar Asturies: #LluchandoPolaSoberanía’ con salida del Paséu Los Alamos pa facer cuatro paraes “que van reclamar la soberanía pa decidir y pa camudar les polítiques en base a cuatro exes: mocedá y educación, llaboral y derechos sociales, xéneru y llibertaes sexuales, y ecoloxismu y mundu rural”, y finar na plaza’l Paragües, esplicó García Álvarez. Tres la llectura d’un comunicáu consensuáu ente tolos convocantes van dar comienzu delles actividaes llúdiques, dende les 14 y hasta les 19.30, que van constar de “una xinta popular, música, un mercadín d’editoriales y coleutivos sociales, xuegos tradicionales y cuentacuentos pa neños y neñes”. Toes elles van ser de baldre –a esceición de la xinta– y abiertes al públicu, cola intención de consiguir la participación de los vecinos d’Uviéu.

“Esta movilización destaca por ser la única que va celebrar la izquierda soberanista asturiana coincidiendo col 8 de setiembre, que ye’l día oficial d’Asturies, y diseñóse d’una manera horizontal, con asamblees abiertes a toles persones y organizaciones interesaes. Afonda nes dinámiques d’unidá d’aición que se tán dando nos últimos tiempos ente los distintos ámbitos del soberanismu”, apuntó González Fernández, qu’afaló a sumase a la convocatoria a toles coleutivos que lo deseen.  

Una encuesta "acientífica"

Entrugaos respeuto a la encuesta del Centru d’Investigaciones Sociolóxiques (CIS) ‘Defensa nacional y fuerzas armadas’, que pon a Asturies como’l territoriu con mayor porcentaxe de sentimientu tantu asturianu como español ente la población, un 80 por cientu, los convocantes de la manifestación y los actos posteriores del llunes señalaron “que ye una muestra de sólo 65 persones; ye de risa, acientífica total”, pa depués destacar que’l métodu de la encuesta, de forma personal en domicilios, “condiciona muncho los resultaos”. “De fecho, los indicadores anteriores nesi sen daben a Asturies, xunto con Canaries, la identidá propia más fuerte de tol Estáu”, añadió Iyán González.

Na semeya, Ariza, García Álvarez y González Fernández, colos sos compañeros detrás y González nel centru.

Contador Estadistiques