“Díaz Delgado y Del Fresno (EQUO): “A otros partíos la prensa fai-yos la campaña”

EQUO presenta la única cocandidatura ente les formaciones qu’acuden a les urnes el domingu. David Díaz Delgado (Avilés, 1967) y Eva del Fresno Díaz (Uviéu, 1977) resultaron escoyíos nunes primaries abiertes y encabecen la llista del “partíu verde” a la presidencia del país.

EQUO trátase d’un partíu en crecimientu. ¿Cómo lo definiría?

Eva: La definición más simple ye que se trata d’un partiu verde. Na nuesa web pue vese que se define como “federalista, republicanu, llaicu y feminista” que prautica “la democracia horizontal y apuesta pola xusticia social, el bien común y los derechos de los animales”.

Ye ún de les poques formaciones que funcionen con primaries abiertes.

David: Que sepamos, somos l’únicu partíu que fai primaries abiertes verdaderes pa tola llista de candidatura. Otros escueyen namái a la cabeza, o bien faen primaries parciales o apliquen ‘llistes plancha’. Amás n’EQUO añadimos la cocandidatura, que significa que, en casu d’algamar un númberu impar de representantes, se formen equipos de trabayu paritarios y se comparte a medies el trabayu y el tiempu como diputáu ente homes y muyeres.

La so campaña eleutoral ta siendo mui activa, anque quiciabes nun tien la visibilidá que merez en los medios de comunicación de mases.

Eva: Ye percomplicao enfrentase contra la parede. Tenemos la impresión de qu’a otros partíos la prensa fai-yos la campaña. Ta nido que siguen mandando le perres que se gasten en publicidá. A EQUO casi nun-y dan espaciu y amás munches vegaes la información nun ye mui correuta, pero tenemos tamién la impresión de tener bona acoyida.

Ún de los actos más llamativos foi’l celebráu na plaza de toros d’El Bibio.

David: Foi ún de los que tuvo más repercusión en prensa, ye verdá. Tratábase de convertir lo que podría ser un actu eleutoral nun acto animalista, nel que pudiera participar el que quixera, llibremente. Y asina ye que nos xuntamos cuatro partíos diferentes y dellos coleutivos animalistes. Ye una muestra más de que trabayamos polos oxetivos y nun tenemos problema en compartir inquietúes y actividaes con otros grupos.

¿Qué espeutatives tienen de cara al domingu?

Eva: Sabemos que la cosa nun ta fácil, pero seguimos trabayando hasta’l minutu caberu pa que’l partíu verde tenga representación tanto a nivel municipal como autonómicu.

Vustedes propunxeron en setiembre, al traviés d’un manifiestu, una aición conxunta d’organizaciones y independientes. ¿Algamaron los resultaos esperaos?

David: Equo participó en toda España nos procesos de confluencia; seguramente sía l’únicu partíu que lo fixo asina. Y como en cada ciudá la situación ye diferente, les soluciones a les que se llegó en cáuna foi tamién diferente. Tamos contentos del resultáu anque nos prestara algamar dalguna candidatura más.

¿Por qué nun hebo alcuerdo con Podemos pa una llista a la Xunta Xeneral?

David: Nun entendemos por qué siempre nos entruguen por Podemos y namái por esti partíu. Con xente de Podemos, d’Izquierda Xunida y d’otros partíos hebo alcuerdos en dellos municipios, pero a nivel autonómicu dende Podemos apostaron por facer ellos les candidatures ciudadanes y que se xuniera’l que quixera, ensin garantías de que fora un procesu llimpiu y que se cumplieran les nueses premises de tresparencia: primaries abiertes, horizontalidá, etc. Nun consultaron con naide nin hebo negociación. Siguieron el so curso independiente ensin plantegase otra cosa.

¿Qué yé necesario camudar p’algamar una Asturies sostenible?

Eva: Munches coses. Lo primero de too, la mentalidá de la xente, pero yendo a coses más concretes, ye necesario un cambiu nel modelu enerxéticu, apostando poles renovables. Y amás ye necesario que se cumplan les lleis y se dote de presupuestu a los programes. Tamién ye importante facer el saneamientu en toles poblaciones pa evitar los arramaos a los ríos y a la mar, qu’acaben con una calidá del agua realmente penosa. Lo mesmo asocede cola xestión de los residuos, que ta siendo malísima, desperdiciando miles de tonelaes de materiales que deberían ser reciclaos. El PP y PSOE, sicasí, prefieren una incineradora.

La so formación destaca pola so defensa de la cultura asturiana. Son una de les poques organizaciones que defenden la oficialidá del asturianu “ensin ambigüedaes”.

David: Eso paez. Caún que faiga lo que-y paeza, pero pa nós ye importante la defensa de la cultura y les costumes, y ta viéndose que nun se va poder avanzar si nun se camuda l’Estatutu d’utonomía pa reconocer la cooficialidá de la llingua y de gallego-asturiano nes zones onde se fala.