‘Samartín de les tortielles’, eventu col asturianu como llingua vehicular, algama la so tercer edición

Esta fin de selmana va tener llugar la tercer edición de ‘Samartín de les tortielles’, eventu gastronómicu col asturianu como llingua vehicular. Participen un total de 25 establecimientos de L’Entregu, Blimea y Sotrondio.

 

‘Samartín de les tortielles’, hermanu de ‘Samartín del pinchu’ que se celebra en seronda, ye una iniciativa de los Empresarios y Comerciantes de Samartín del Rei Aurelio (ECOSAM) con un ésitu importante de participación d’hosteleros y d’asistencia de veceros que destaca por emplegar l’asturianu en toles sos estayes, “ayudando d´esta manera a la normalización de la llingua asturiana fuera de los tradicionales ámbitos de la cultura”. Na edición del 2012 vendiéronse un total de 6.590 raciones de tortiella, lo que supunxo un 35 por cientu más que’l primer añu, cifra que se pretende superar esta fin de selmana.

 

El vienres, y hasta’l domingu, yá van tar disponibles pal públicu les 25 creaciones presentaes a concursu, tortielles que lleven ingredientes tán diversos como pulpu, oricios, centollu, llagostinos, amasueles, gambes, carne guisao, morciella matachana, carne picao, xamón, salchiches, setes, xampiñones, calabacinos, pimientos, quesos o almendres. Como ye vezu, la organización va repartir 2.000 gastromapes pa facilitar la llocalización de los establecimientos que se deseen visitar y propón dos rutes, una per Sotrondio y Blimea y otra per L’Entregu, p’aquellos que nun se quieran perder nenguna tortiella. Los chigres participantes son: La Güestia, Domoe, Casa del Pueblo, El Ocho de Chapá, Cervantes, El Urogallo, El Puente, El Semáforo, El Zamorano, La Conda, La Laguna, La Tená, Mejuto, Urban 5 y Válgame Dios (ruta per L’Entregu); El Indio, El Cascayu, El Secañu, Casa del Pueblo de Blimea, Josefina, La Antigua, Palermo, Les Carboneres, La Cabaña y San Mamés (ruta per Sotrondio y Blimea).

 

El ganador de la edición del 2013 foi la sidrería El Puente con ‘‘Milhoja’ de tortiella con cruxente de xamón y gambes’, que sumó un 16 por cientu de los votos. Como n’ocasiones anteriores, el xuráu va ser la propia clientela, pa lo que deberá, polo menos, prebar cuatro tortielles diferentes. Les persones que voten van poder ganar 100 euros en compres en cualquier de los establecimientos asociaos a ECOSAM. Hai que destacar que 'Samartín de les tortielles' cuenta col asesoramientu de la Oficina de Normalización Llingüística de Samartín del Rei Aurelio.