‘El Parque Histórico Fala 2015’ va trayer actividaes a lo llargo del añu a los conceyos de la rexón

|

Nueve conferencies, quince charres escolares y nueve esposiciones conformen ‘El Parque Histórico Fala 2015’, ciclu d’actividaes que van desendolcase a lo llargo del añu nos nueve conceyos de la rexón. La primera va tener llugar esti vienres en Llóngara cola participación d’Aurora Bermúdez.

La maestra y escritora va ufrir la sesión ‘Contacontos’ a los escolinos y escolines de gallego-asturiano del CP José Álvarez Valdés, prevista pa les 13 hores. Bermúdez va falar a los rapacinos sobre la so obra en fala ‘Como el can y el gato’ pa depués lleer dalgunes de les histories presentes nella. Ésta va ser la primer de les quince charres destinaes al alumnáu de gallego-asturiano de la rexón pa dar a conocer la producción lliteraria na llingua del llugar y otros aspeutos sobre ella.

‘El Parque Histórico Fala 2015’ tamién va mirar al públicu xeneral, col entamu de conferencies y esposiciones d’obres lliteraries y otros materiales editaos n’eonaviego por entidaes del sector públicu asturianu. A la prevista pa esti vienres n’El Franco, va siguir una charra nueva pa escolares, nesta ocasión nel CEIP Príncipe de Asturias de Tapia’l martes, cola participación de Diego del Mourín col tema ‘Un pescador tapiego’. La Oficina de Coordinación Cultural y Llingüística da Fundación Parque Histórico del Navia ye la responsable de toes estes actividaes en collaboración colos conceyos de la rexón, esto ye, El Franco, Tapia, Bual, Cuaña, Eilao, Grandas, Navia, Pezós y Villayón.

Contador Estadistiques