Últimos díes pa matriculase pa la UABRA

Esti vienres fina’l plazu pa matriculase pa la Universidá Asturiana de Branu (UABRA) que se celebra en Cangas na primer quincena d’agostu. Dos de los cursos más demandaos son el de ‘Xestión Cultural n’Asturies: creando cultura al traviés de los medios’ y el de ‘Averamientu al cine n’asturianu’.

El primeru, dirixíu por Isabel Hevia, busca “afondar na conocencia de la teoría y les ferramientes práutiques de la xestión cultural venceyaes n’especial a los campos de la xestión de la política llingüística y la cultura n’Asturies, averándonos a la conocencia de la situación de la estaya y apurriendo ferramientes básiques pal trabayu nel campu de la xestión cultural n’Asturies, dende un puntu de vista teóricu y práuticu”. Cristóbal Ruitiña, María Xosé Rodríguez y Inaciu Galán participen como maestros nel programa formativu d’esti cursu, que cuenta con un videu de promoción.

Mentes, la profesora Loreto Díaz Suárez va tener en ‘Averamientu al cine n’asturianu’ la collaboración de l’actriz María Cotiello y del cineasta Pablo A. Quiroga. Esti cursu, con una carga mayoritaria práutica, naz col oxetivu d’averar a los participantes “a la producción audiovisual n'asturianu al traviés d'un percorríu peles películes, curtiumetraxes, vidioclips y productos televisivos, asina como, al traviés d'actividaes eminentemente práutiques, conocer y realizar un proyectu específicu de realización audiovisual”. Cotiello encargaráse d’amosar a los alumnos téuniques cencielles d'interpretación al traviés de xuegos y improvisaciones, mui útiles a la hora de la creación de personaxes y situaciones, mentes que Quiroga va centrase na parte téunica de la realización audiovisual, dende la idea a la proyeición final, pasando pela etapa del rodaxe.

Estos cursos formen parte de los ‘Afondamientu Cultural y Llingüísticu’ de la UABRA y van coincidir en feches, yá que dambos van desendolcase na segunda selmana, del 10 al 14 d’agostu. Na primera, del 3 al 8, va impartise ‘Capacitación pa la traducción al asturianu’, a cargu de María Cristina Valdés, y ‘Más presees d’aplicación escolar na rede’, coordináu por David Melendi. La matrícula pa cáun d’ellos ye de 190 euros y inclúi materiales y la pensión completa na Escuela-Hogar de Cangas del Narcea.

El restu de cursos

L’actividá na UABRA va completase colos cursos más veteranos: el ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, que tienen un costu de 300 euros, too incluyíu, y consten de 60 hores llectives. A ellos hai que sumar el ‘Cursu de Gallego-asturiano (primeira fase)’, destináu a maestros d’Infantil, Primaria y Secundaria, qu’esti añu va durar los doce díes de la UABRA y tien el mesmu preciu de matrícula que los anteriores.

El día caberu pa formalizar les matrícules pa cualquier d’estos cursos ye’l vienres. Pa ello hai qu’acudir a la sede de l’ALLA (L’Águila 10, Uviéu)  col importe necesariu y una semeya nel horariu siguiente: hasta’l xueves, de 9 a 15 hores y de 16 a 19 hores; y de 9 a 14 hores, el vienres. Por mor de la demanda alta que tienen estos cursos, la institución va siguir un orde rigurosu d’inscripción.