Ígor Medio y Lisardo Prieto emiten en Dual

Los dos músicos asturianos de folk, Ígor Medio y Lisardo
Prieto, presenten güei'l so primer discu como dúu. Una
formación qu'apuesta polo cantao y que con solo l'acompañamientu
d'un vigulín y un bouzouky son quien a enllenar de milenta matices los
dolce temes del so primer discu que s'entitula Dual.



Estos músicos son yá unos veteranos na música folk
asturiana, anque non por edá, si nón por esperiencia. Per un llau
ta Ígor Medio, cofundador de
Felpeyu en 1991, arriendes de participar como músicu o productor
d'otros grupos como Tejedor, Corquiéu o Gatos del Fornu. Pela so parte,
Lisardo tamién tien nel so haber una bona riestra de trabayos como
miembru tamién de Felpeyu dende 1999 y n'otros grupos como N'Arba.
Precisamente ye en Felpeyu onde topamos el retueyu d'esti dúu, ya que'l
so trabayu en conxuntu nel grupu llévalos a preparar un repertoriu
p'actuar per primer vegada nel ciclu de conciertos Folk de Cámara de
Xixón en febreru de 2000, ciclu d'onde tamién surdieron otres
formaciones como
DRD
o Tuenda.
Dempués d'esti conciertu'l grupu afonda nel proyectu del dúu
hasta esti momentu nel que saquen el so primer discu.



La principal característica d'esti grupu, y que s'espeya perfectamente
nesti cd, ye la propia formación. Ye dicir, nun ye vezu de los grupos
asturianos escoyer una estructura tan reducida, con namás que dos
músicos. Pero anque lo pequeño de la formación puede
facenos camentar que limita munchos les sos posibilidaes, lo que fai ye
namás qu'abrir ciertos recursos y permitir al dúu facer coses que
con otru tipu de formaciones, principalmente de más xente y
instrumentos, fáense más difícil de desenvolver. Asina
Lisardo y Ígor toquen el vigulín y el bouzouky nesti discu
respectivamente, colo que tenemos namás qu'un instrumentu
melódicu -vigulín- y otru d'acompañamientu - bouzouky-,
pero que pueden espardese espresívamente con tola la llibertá
que, como dicíemos enantes, nun tienen n'otru tipu de formaciones.



Pero los pegollos que caltienen esti discu son trés, los dos
instrumentos y la voz, principalmente la d'Ígor Medio -cantante
tamién en Felpeyu- y que tien delles vegaes el sofitu de coros de
Lisardo. Pa les lletres de los cantares el grupu punxo-y música a poemes
d'asturianos como Pin
de Pría, Fernán Coronas
o Xosé Miguel
Suárez "Tapia", arriendes de dalguna lletra tradicional.
P'acompañar estes lletres el grupu apuesta por facer igües sobre
les melodíes tradicional, con dalguna amiestu de composición
propio. Con too y con ello, el discu tamién acutó dalgún
requexu pa pieces instrumentales dafechu, con composiciones propies y versiones
de pieces tradicionales.



El discu espublízalu la casa de discos Tierra responsable d'otros
trabayos discográficos como'l de La
Bandina'l Tombo y Tuenda. El cd
grabóse nos estudios Elkar de Donostia -Guipuzkoa- cola
producción de los propios integrantes del dúu y César
Ibarretxe, que tamién participó nel discu como técnicu de
soníu, mezcla y mastering, xunta otros músicos collaboradores
como Horacio A. García que tocó'l contrabaxu y Lorena Gª
Caro que grabó clarinete y teclaos en dalgunes pieces.



El grupu va presentar al públicu esti discu nun conciertu que van dar el
próximu día 22 de febreru nel Antiguu Institutu Xovellanos de
Xixón, onde tamién va actuar el grupu Tuenda esi mesmu
día. Pero Asturies.com quier ufiertar güei a los nuesos llectores
la posibilidá de ver yá a esti dúu en directo. Ello ye que
na sección de videu d'esti diariu
yá se puede ver un videu
d'ún de los cantares qu'echaron l'otru día Lisardo Prieto y
Ígor Medio na entrega'l pasáu vienres 27 de los Premios
Andrés Solar qu'apurre la Xunta pola Defensa de la Llingua Asturiana.
Amás el discu yá se puede mercar na nuestra tienda na rede,
Asturshop.com.