Álvarez Sostres asegura que’l pautu ente’l PSOE y el Partido Popular “ta vivu y en plena actividá”

El voceru de FAC, Enrique Álvarez Sostres, aseguró tres la sesión constitutiva de la Xunta Xeneral que’l pautu supuestu ente’l PSOE y PP “ta vivu y en plena actividá”. Francisco Álvarez-Cascos yá fixera referencia a esi alcuerdu en delles ocasiones.
 
Álvarez Sostres considera que la composición final de la Mesa de la Xunta Xeneral, presidida pol popular Fernando Goñi, nun se correspuende “col apoyu recibíu nes urnes” y que’l pautu de güei pueda llegar a dase tamién na sesión d'investidura. Na so opinión, el PSOE ta “llexitimáu” pa presentar candidatu a la presidencia d'Asturies.
 
El diputáu de FAC continuó la so primer intervención como voceru de la formación d’Álvarez Cascos que l’acuerdu ente PP y PSOE, dos partíos que de primeres nun tienen nada que ver, básase na “permisividá” en casos de corrupción supuesta como ‘Villa Magdalena’ y la ‘Operación Marea’. Mentes, al respeuto de la posibilidá de que'l PP pautara ensin consultar con Génova, Álvarez Sostres calca en que’l Partíu Popular ye “bien disciplináu”, polo que nun pue producise una actitú de desobediencia ente los diputaos asturianos, sinón que más bien tienen l’aprobación de la cúpula estatal y del propio Mariano Rajoy. “El pautu ente ellos sigue vixente –en referencia a PP y PSOE– y ta avaláu por Mariano Rajoy y pol presidente en funciones a nivel rexonal, Gabino de Lorenzo”, remarcó.
 
Con too, el voceru del partíu presidíu por Álvarez-Cascos recordó que Foro Asturias intentó algamar un alcuerdu col PP que pasaba per un pautu de llexislatura pa garantizar la gobernabilidá d’Asturies, y reprochó que los populares namás tuvieren interesaos nun puestu nel parllamentu. Sicasí, afirmó que FAC sigue dispuestu a llegar a alcuerdos, tanto col PP como col resto de les fuercies polítiques con representación, pal día de la eleición del presidente y pal intre de la llexislatura. “Nun damos por fecho nada”, afirmó, recordando que les trés selmanes que queden pa la sesión d’investidura suponen “una eternidá” en política.