Álvarez-Cascos cree que los pautos van ser “imprescindibles”

El presidente últimu del país, Francisco Álvarez-Cascos, considera que, cola situación nueva, los pautos son “imprescindibles”, al igual que les “renuncies parciales” y el “diálogu”. Foro de Ciudadanos perdió trés escaños en comparanza con hai 15 meses.
 
Según señaló, por parte de Foro "nun va quedar" l’empeñu pa dialogar con toos aquellos que tean dispuestos a aportar y aceptar "de forma lleal" idees y esfuerzos pa llevar a Asturies a la sienda del crecimientu, del emplegu, del progresu y del bienestar "pa que los asturianos faigámonos responsables del futuru del nuesu país y arguyosos del nuesu pueblu". Álvarez-Cascos insistió na importancia de los resultaos del so partíu, que se "consolidó" a pesar de los despliegues "ensin precedentes" de los dos grandes partíos estatales. En cualisquier casu, dixo que Foro ye y siguirá siendo una formación "de Gobiernu". 
 
Na so opinión, Asturies tornó a falar "alto y nidio" y volvió a apostar pol cambiu de la política desendolcada pola izquierda nos doce años últimos. "Los asturianos tornen a dicir que la izquierda significa’l pasáu y que la nuesa formación tien que siguir lliderando la tresformación d’Asturies", añadió pa depués reiterar que se siente “más apasionáu que nunca na llucha pol nuesu país, pa que nun síamos más que naide, nin tampoco menos que los demás, y mantengo’l propósitu, nel contestu político y social de la nuesa querida España, d’arimar el llombu dende Asturies pa evitar que dende afuera nos discriminen o que nos marxinen".