“Cuentos del Sil” estoyu de cuentos n’asturianu a la otra parte del cordal

Nueve autores lleoneses participen nel volume "Cuentos del Sil" que s'asoleya esti mes d'abril y que ye una de les poques obres lliteraries en llingua asturiana que s'espubliza en Lleón dende que nel añu 96 apaeciere'l volume "Cuentos de Lleón " que s'escosó al poco de llegar a les baldes de les llibreríes.

Les asociaciones culturales "El Fueyu" y "El Toralín" col sofitu de la Diputación de Lleón son les responsables d'esta edición que ta yá pa salir d'imprenta nos próximos díes y na que s'inxerten relatos d'autores yá con trayectoria lliteraria y d'otros más mozos. Ente los escritores que participen nesti "Cuentos del Sil" tan Roberto González-Quevedo, Eva González, Severiano Álvarez, Adrianu Martín, Daniel Fernández, Xandru Díez, Félix Llópez, Abel Uxeniu Pardo y Xuasús González. Los cuentos son de temática variao, dende testos de tipu costumista hasta rellatos de raigón más urbanu pasando per cuentos qu'espeyen periodos históricos como la guerrilla de la posguerra o los fenómenos migratorios.