El Parlamentu vascu refuga pidir a ETB-1 infantiles en castellán

La comisión parllamentaria de Control d'EITB refugó una proposición non de llei del PP que pidía plantegar a la Dirección d'EITB la posibilidá d'emitir infantiles en castellán.

La iniciativa refugóse colos votos en contra del PNV, Aralar y EB, y l'astención del PSE. El parllamentariu del PP Carlos Urquijo recordó que'l pasáu mes de marzu el direutor xeneral d'EITB, Alberto Surio, anunció que próximamente se presentaríen les conclusiones del grupu de reflexón qu'estudia la reforma de la programación d'ETB y la puesta en marcha d'ETB-54 como canal temática deportiva en vascu y castellán.
  
Pa Urquijo, esta situación supón un cambiu de criteriu puesto que, nesti momentu, los deportes y la programación infantil de la cadena pública vasca son esclusivos de la programación en vascu. Nesti sen, recordó que'l PP defendió que tola programación tendría de ser susceptible de recibise nes dos llingües oficiales, "considerando inalmitible que los que desconocen el vascu nun puean siguir los eventos deportivos o l'entretenimientu infantil en castellán".
  
Por ello, solicitó que la programación infantil "dexe de ser patrimoniu esclusivu de la primer canal d'ETB" y plantegó que la Cámara vasca solicite a la direición d'EITB que, con motivu del diseñu de la nueva programación d'ETB 1, "contemple la posibilidá de que la programación infantil s'emita nes dos llingües oficiales del País Vascu"".
 
La parllamentaria del PNV Jone Berriozabal refugó la iniciativa al considerar "evidente" que los neños que quieren ver dibuxos en castellán "tienen bastantes opciones, más agora cola creación de TDT, mientres que los vascoparlantes la única oportunidá que tienen de ver dibuxos ye ETB".
  
El parllamentariu del PSE Carlos Gorostiza, pela so parte, defendió qu'ún de los oxetivos de los fundamentos d'EITB ye "defender los oxetivos de promoción y defensa del vascu" y esclarió que "nun tamos nuna televisión al serviciu d'un idioma sinón al serviciu de los ciudadanos que falen nún y otru idioma". Coles mesmes, sorrayó la importancia de qu'EITB seya "la única televisión qu'ufierta programación en vascu", y consideró qu'esto ye una "dixebra estratéxica y hasta competitiva" pa la cadena.
  
Dende Aralar, Mikel Basabe, afirmó que nun entiende la propuesta del PP, y señaló que buscar una sociedá billingüe supón qu'otros factores, amás de la Educación, tienen de tenese en cuenta como la televisión pública. "Nun se trata d'un escesu demandar que los dibuxos animaos sigan dándose en vascu, cuando ETB ye la única televisión pública que fai una ufierta en vascu", defendió.  
  
El parllamentariu d'EB, Mikel Arana, afirmó que'l pidimientu d'Urquijo de querer ver una televisión que paga colos sos impuestos en castellán, "yá existe y ye TVE" . Amás, refugó apoyar la propuesta 'popular' porque "si queremos avanzar nun País Vascu billingüe tenemos d'apostar poles grandes xeneraciones, y la emisión de programación infantil en vascu ye un métodu pa euskaldunizar a les nueves xeneraciones".