Garzón remite a xulgaos d'instrucción, ente ellos d'Asturies, la investigación sobre neños perdíos nel franquismu

|

El xuez de l'Audiencia Nacional Baltasar Garzón unvió la investigación sobre los denominaos 'neños perdiós del franquismu' a siete Xulgaos decanos d'España, en concreto, los asitiaos en Barcelona, Burgos, Valencia, Vizcaya, Madrid, Málaga y Zaragoza, según s'endiente d'un autu del maxistráu al que tuvo accesu Europa Press.

Nel so autu, fecháu'l pasáu 26 d'avientu, el xuez acuerda desabrise de la causa sobre la memoria histórica a favor de los xulgaos d'instrucción territoriales, n'aplicación de la decisión tomada pola Sala de lo Penal que declaró la so falta de competencia pa instruyir sobre les muertes y desapaiciones producíes demientres la Guerra Civil y el Franquismu.

Garzón unvía amás la causa --na midida na que a caún-y correspuende en función de los fechos asocedíos na so repectiva xurisdicción, especifica-- a los xulgaos d'Instrucción d'A Coruña, Asturies, Badaxoz, Burgos, Castellón, Córdoba, Granda, Güelva, Güesca, Lleón, Llugo , Madrid, Navarra, Palencia, Pontevedra, Salamanca, Soria, Toledo, Zamora, Zaragoza, Alicante, Valencia, Manacor y Palma Mallorca.

Desábrese tamién a favor de los Xulgaos d'Instrucción Decanos de les poblaciones d'Herrera del Duque (Badaxoz), Pamplona (Navarra), Trujillo (Cáceres) y Astorga (Lleón) pa que seyan estes dependencies xudiciales les que dean respuesta a los "desentierros solicitaos".

Esti nuevu autu de Garzón sigue al dictáu pol xuez el pasáu mes de payares nel que yá tomaba la decisión de desabrise dada la muerte de los altos cargos del réxime de Franco, a los qu'acusaba d'un delitu permanente de detención illegal ensin dar razón de paraderu qu'encaxaba, según el maxistráu, col contestu de crimes escontra la humanidá.

El xuez especifica que la decisión de desabrise acordada entós materialízase agora "según lo decidío pola Sala", polo que van ser "los xulgaos que resulten competentes los que van tener qu'asumir o nun asumir dicha calificación y la continuidá o non de los procedimientos", incluyíos los relativos a les desapaiciones "llegalizaes", robos y cambios d'identidá de menores d'edá demientres los años del franquismu.

Contador Estadistiques