Cinco años d’El Llumbreiru

|

La revista de l’asociación Furmientu cumple cinco años “amosando que’l lleonés esiste y formó y sigue formando parte del patrimoniu cultural de los zamoranos”.

A lo llargo de cinco años y trimestralmente, la revista espublizó ventiún númberos con noticies sobre’l propiu idioma, una estaya lliteraria y otra d’artículos divulgativos y d’opinión.
 
Según indiquen na editorial d’esti últimu númberu, ‘El Llumbreiru’ nació en marzu de 2005 depués d’ingresar en Furmientu socios nuevos, “mozos, entusiastes y preparaos”. Colo qu’entamaron a trabayar por una revista que quería divulgar el patrimoniu llingüísticu de Zamora; “lo que se pretendía cola publicación de ‘El Llumbreiru’ yera allumar, refundiar lluz sobro ún de los aspeutos más escurecíos ya inoraos del nuesu patrimoniu cultural”.
 
A lo llargo de cinco años, la publicación foi espeyando la evolución del movimientu de reivindicación llingüística en Zamora. Asina, amosó los pasos llegales siguíos por Furmientu buscando que la protección llegal del lleonés: la solicitú de declaración como Bien d’Interés Cultural y la quexa al Procurador del Común de Castiella y Lleón pola falta de cumplimientu de la obligación de protexer el lleonés qu'establez l'Estatutu d'Autonomía, que'l so resultáu foi qu'esta institución dio la razón a Furmientu y encamentó en repitíes ocasiones al gobiernu autonómicu ps que cumpla lo establecío pol Estatutu.
 
Tamién recoyó como les Cortes de Castiella y Lleón reconocieron per primer vez l’idioma propiu cola aprobación del artículu 5.2 del Estatutu, onde se recueye la proteición del lleonés, “magar inda nun se materializó n'aiciones concretes dexa allugar fundaes esperances y contien amás una notable carga simbólica”.
 
Tamién reseñen, mirando haza atrás, el surdimientu d’una actividá lliteraria n’asturianu en Lleón y Zamora, señalando l’actividá de la editorial Filandón y los premios lliterarios convocaos pola asociación La Caleya y el Conceyu d'Astorga.
 
“Creemos que nestos años ‘El Llumbreiru’ cumplió razonablemente bien el cometíu d'ufiertar una información oxetiva y accesible sobro'l patrimoniu llingüísticu zamoranu y contribuyir a la so protección y dignificación. L'interés per esta parte de la nuesa cultura creció ensin dulda nestos años, como se reflexa nel aumentu nel númberu de suscriptores d'esti boletín y nel de socios de Furmientu”, apunten pa finar.

Contador Estadistiques