Ximiélga.me abre pa tolos usuarios

|

Depués de dellos meses de prueba en beta privada, los responsables d’Altuxa abren güei al públicu en xeneral el dominiu ximiélga.me, la primer rede social n’asturianu.

La páxina ta llamada a convertise nel puntu de referencia de ciberespaciu n’asturianu, onde los usuarios interacciones ente ellos y puean espardese per otros filos fuera de la propia páxina.
 
El proyeutu, desendolcáu por Altuxa en collaboración de Softastur, quier ser un complementu a Facebook o Twitter y cuenta con serviciu de microbloging (nomáu "El telégrafu"), un sistema pa guardar enllaces na cuenta del usuariu (como los marcadores d'un restolador pero online) y una especie de "muru" asemeyáu al de Facebook.
 
Ximiélga.me tenía tamién un sistema de mensaxería instantaneo ente collacios coneutaos, “pero pola enorme carga que supón pal sirvidor les consultes d’estáu constantes decidimos descartalo”, señala Mikel González, ún de los responsables del proyeutu.
 
Con too, quieren facer una sala de chat global pa la web, “colo que'l sistema nun tien de facer tantes consultes, sicasí les charres serán públiques a tolos usuarios coneutaos al sistema, pensamos que col sistema de mensaxería interno cúbrese la necesidá de facer comentarios individuales”.
 
La rede social entamó en beta privada’l 18 d’avientu del añu pasáu, siendo los sos primeros usuarios los blogueros que votaron pola meyor páxina personal de 2009. “El periodu de beta foi mui satisfactoriu, nun tuvimos problemes críticos pol aspeutu téunicu, pero lo que más prestó foi l'acoyida de tolos voluntarios que ficieron de ‘testers’ y tola aida que dieron, dan y darán”, apunta Mikel.
 
Sobre’l futuru señala que nun esperen nada más que preste a la xente y que lo use, “amás pa nós ye una plataforma bien guapa pa desendolcar preseos”. Mikel González diz que lo guapo ye'l sistema modular nel que se basa Ximiélga.me, “podemos dir amestando preseos qu'interesen y desaniciar los que nun tengan uso mui fácilmente”. Fala d’un trabayu continuu, “nun tenemos una meta onde digamos que tará completu ximiélgame, polo menos de momentu”.
 
Desendolquen tola xera nos ratos llibres, y en poco tiempu esperen ampliar el soporte pa videos nel telégrafu o nos enllaces, montar un API pa poder tener aplicaciones d'escritoriu que trabayen con ximiélgame, qu'otres páxines puedan interactuar facilmente con ximiélgame… Hasta falen de la posibilidá d’una versión pa móviles, “sicasí nun tien muncha prioridá de momentu”.

Comentarios

Es bueno leer esto. Lo que escribes es muy bueno. Vale la pena leer. gaming laptops |gaming notebook|NP7280

Contador Estadistiques