La Wikipedia va permitir xubir videos

La Wikipedia va entamar a permitir l'usu del videu dientro de los artículos. La enciclopedia llibre n’asturianu asítiase anguaño per baxu de llingües como l’aragonés o’l quechua.

La novedá del usu del videu, vien por una campaña de la Open VideoAlliance pa introducir el sistema. La iniciativa, llamada explícitamente Let's Get Video on Wikipedia, desplica pasu a pasu como los editores y collaboradores de la enciclopedia pueden añedir vídeos a los artículos de la enciclopedia llibre.

Nesti pasu haza'l videu, fíxose un esfuerciu pa facilitar la conversión de videos a Theora, el formatu abiertu qu'usa Wikipedia. La Participatory Culture Foundation, impulsora del reproductor de videos en llinia Miro, presentó una aplicación de conversión a Theora para Windows y Macintosh.
 
Conocimientu en 250 llingües
 
La Wikipedia n’asturianu, la Uiquipedia, tien anguaño 13,262 artículos fechos por 7.880 usuarios, de los qu’hai 105 activos (fixeron dalguna collaboración nos últimos 30 díes). La nuesa enciclopedia llibre ocupa’l puestu 82 en númberu d’artículos nel llistáu de les más de 250 wikipedies, tando perbaxo de llingües como l’aragonés, el bretón, el galés, l’occitanu o’l quechua, pero por riba del irlandés, l’escocés-gaélicu o’l corsu.
 
Anguaño, la Wikipedia con más información ye la inglesa, con más de tres millones d’entraes, siguida poles llingües alemana y francesa, con al rodiu d’un millón d’artículos. Mientres que la enciclopedia llibre en kaurí, dialeutu africanu faláu por cuatro millones de persones, namás tien un artículu, siendo la más ‘pequeña’ de les wikipedies.

Comparte...                                    

Enllaz permanente