Los llagareros refuguen el proyeutu de Llei de Comunicación Audiovisual

L'Asociación de Llagareros valora negativamente la Llei del Audiovisual que restrinxe la publicidá de sidra. Poro, piden a los diputaos asturianos defender una redacción distinta.

L'Art.18.3.d del Proyeutu de Llei Xeneral de Comunicación Audiovisual prohibe “la comunicación comercial televisiva de bebíes alcohóliques con un nivel inferior a venti graos cuando s'emita fuera de la faza de tiempu ente les 20:30 hores y les 6:00 hores del día siguiente, sacantes qu’esta publicidá forme parte indivisible de l'alquisición de drechos y de la producción de la señal a espublizar”.
 
Pal coleutivu d’ellaboradores de sidra natural asturiana resulta “manifiestamente inxustu” que s’amesten les bebíes tradicionales de baxa graduación alcohólica con bebíes destilaes, “escaeciéndose que les primeres gocien de fondes referencies culturales y históriques y formen parte de dietes saludables a xuiciu d'espertos d'incontestable solvencia”.
 
Los llagareros afirmen qu’esta llei traería efeutos negativos de caltenese l'actual redacción, “non yá para la publicidá y divulgación de la mesma bebida en sí, tamién afeutaría al turismu gastronómicu, una actividá con gran potencialidá y entá desenvolviéndose n’Asturies”.
 
Dende ALA. apunten la “hipocresía” que supón la restricción d'horarios plantegada, “cuando nesa mesma faza horaria ye habitual y yá acostumáu programar conteníos violentos, escenes de sexu esplícitu o otra serie d'escenes poco edificantes pa la población infantil”.
 
Los llagareros confíen que la redacción del polémicu artículu seya camudada nel Congresu de los Diputaos en próximes feches y esperen que los diputaos asturianos defendan una redacción distinta y compatible cola proteición de los menores.

Comparte...                                    

Enllaz permanente