UXT diz que pal Principáu la educación "nun ye una prioridá"

FETE-UXT diz que la educación nun ye una prioridá, yá que depués de meses d'espera "desvelen el misteriu y realicen una ufierta d'emplegu públicu manifiestamente escasa".

Pal sindicatu, el númberu de places ufiertaes, 114, ta bien lloñe del númberu de xubilaciones producíes a lo llargo del pasáu añu. Al traviés d'un comunicáu la organización sindical afirmó que con esta ufierta l'Alministración asturiana, una vez más, contribúi a aumentar l'emplegu precariu, puesto que miles d'opositores asturianos tendrán de buscase'l sustentu n'otra parte y la sociedá asturiana va perder, igual para siempre, una mano d'obra cualificada y sobradamente preparada.
  
"La presente ufierta zarra'l círculu del maltratu a la enseñanza pública. A la supresión de 61 puestos de trabayu en plantiya orgánica únese agora esta ufierta d'emplegu públicu que de nenguna manera cumple les mires d'amenorgar el porcentaxe de interinidá perbaxo del 8%", destacó'l sindicatu.
  
Por ello FETE-UXT esixe a l'Alministración un cambiu radical qu'asitie a la Educación asturiana nel llugar que se merez, con una ufierta d'emplegu públicu amplia pa toles especialidaes del cuerpu de profesores de secundaria, máxime cuando ésta ye posible y necesaria.
  
Destacó que la so intención ye siguir axustando y algamar una xubida de la ufierta d'emplegu pública inicial. Nesti sen manifestaron que les sos propuestes basáronse nel estudiu realizáu por FETE-UXT que contempla les vacantes ocupaes de primeres de cursu y a les qu'hai que sumar les xubilaciones.