Martxelo Otamendi: “La Guardia Civil piensa que too ye ETA, acusa y munchos maxistraos firmen”

L’ex direutor de ‘Egunkaria’ dixo n’Uviéu que’l procesu contra ‘Egunkaria’ vino por un intentu de notoriedá del xuiz Del Olmo y mantúvose pola tesis de la Guardia Civil de que “too ye ETA”.

Martxelo Otamendi foi esbillando ayeri nel local Cambalache d’Uviéu, los datos de la historia del diariu ‘Egunkaria’ -diariu peslláu nel 2003 por orde xudicial- , y del llamáu ‘casu Egunkaria’, xuiciu qu’acabó'l pasáu día ún na Audiencia Nacional y ta a la espera de sentencia. La Fiscalía pidió l'absolución de los cinco direutivos del periódicu procesaos, mientres que l'acusación popular, exercida por Dignidad y Justicia y l'Asociación de Víctimas del Terrorismo, pidió penes d'ente 12 y 15 años de cárcel por un presuntu delitu d'integración n'organización terrorista.
 
El direutor del únicu diariu en vascu qu’esistía, cuntó como’l procesu pa editar ‘Egunkaria’ entamó nos 80, cola llegada de l’autonomía y coles primeres emisiones d’ETB, la televisión pública vasca, “amosando que podía emitise un partíu de fútbol o dar información internacional en vascu”, apuntó Otamendi.
 
‘Euskaldon Egunkaria’ (el diariu de los vascofalantes), ñació’l 6 d’avientu de 1990, cola vocación de convertise nel diariu referente pa los sos llectores y puxando por tener una llinia editorial amplia, “que cualesquier llector vascofalante de cualesquier ideoloxía sintiérase representáu nel mediu”, señala Otamendi.
 
Anque esclaria qu’a pesar de nun ser un diariu nacionalista, “sí yéramos un diariu nacional, con una tendencia progresista, más averaos a Palestina qu’a Israel, a los ateos qu’a los católicos”. Referenciando como en plenu añu 93, “cuando tovía los armarios taben enllenos”, fixeron un suplementu sobre gais y lesbianes conmemorando’l 28 de xunu, día del arguyu gai, “probablemente lo más peligrosu que llegamos a publicar pa la seguridá del Estáu”, diz socarrón.
 
La historia del diariu entamó cambiar en 2001, cuando la Guardia Civil propón a’l xuez Baltasar Garzón investigar ‘Egunkaria’, refugando ésti facelo. Pero depués, el xuez Del Olmo cueye’l casu, “taba recíen llegáu y quería notoriedá”, y autoriza una investigación policial secreta, “dende 2001 hasta 2003 tuvimos siendo investigaos, los nuestros teléfonos interveníos y les nuestres cuentes corrientes controlaes”. Asina'l 20 de febreru de 2003, el xuez ordena a la Guardia Civil l’arrestu, rexistru, custodia y treslláu de diez persones, “de los cuales nueve tuvimos rellación con cargos direutivos n’Egunkaria”.
 
Un arrestu que foi de nueche, Otamendi recuerda como llamaron a la puerta a la 1.30 de la mañana y 15 guardies civiles entraron a rexistrar la so casa "apuntándome con una pistola”. Diz que se llevaron coses como una ikurriña, una bandera en contra de la dispersión de los presos vascos, un llibru de Pilar Urbano o ún en vascu sobre los pescadores de ballenes en Terranova, “cuando salieran les imaxes de la detención por televisión, había que dar la sensación d’un gran golpe a ETA, de qu’incautaren munches coses, igual bombes”.
 
Después llegaron cinco díes d’incomunicación, “los que permite la llei antiterrorista”, onde según el direutor de 'Egunkaria' seis de los deteníos, ente ellos él, foron sometíos a tortures, intentando que cuntara, ente otres coses, como consiguiera unes entrevistes a miembros d’ETA poles que yá fuera llamáu a declarar a l’Audiencia Nacional, “sentenciando’l propiu xuez Garzón qu’aquelles entrevistes yeren d’interés públicu y que nun taba faciendo apoloxía del terrorismu”
 
Diz que pasó tres díes de pie mirando a una paré blanca, col drechu a sentase cada cinco hores mientres 20 minutos. Tamién, comenta, tuvo que facer exercicios físicos, “vistíu y desnudu”, repitiendo constantemente qu’Irún yera España. Amás, afirma que sufrió vexaciones pola so condición d’homosexual.
 
Una vegada terminaes les declaraciones cuenta que pasaron a l’Audiencia Nacional, onde declaren delantre del xuez, que decreta prisión pa dalgunos y la llibertá baxo fianza por 30.000 euros de tres de los imputaos, ente ellos Martxelo Otamendi. Pero’l xuez, depués de que’l direutor de ‘Egunkaria’ cuntara les tortures que sufrió, decide mandalo unes hores enantes de ponelo en llibertá a la cárcel de Soto del Real, d’onde diba salir a les nueve de la nueche, “queríen que nun hubiera medios cubriendo la mio salida, pero ETB taba ehí y coneutó en direuto nel informativu de les nueve de la nueche, el de más audiencia del País Vascu y toos pudieron sentime cuntar lo que nos fixeron”.
 
La razón del pieslle del diariu, yera qu’ETA financiaba’l mediu y qu’entós los direutivos yeren persones nomaes pola banda. Según Otamendi, l’autu del xuez Del Olmo qu’ordena zarrar ‘Egunkaria’, diz que cuando se punxo en marcha’l diariu nos 90 cola venta d’acciones y algamaron 120 millones de pesetes, tenía qu’haber una financiación esterna y que seguramente yera d’ETA, “pero cuando m’arrestaron a min nun m'entrugaron pola financiación, namás poles entrevistes con ETA, algamando información que nun valió pa nengún xuez, sinón pa la propia Guardia Civil”.
 
A la fin, nel Autu de Procesamientu del xuez, “una investigación de 600 fueyes”, nun se fala en nengún momentu de la supuesta financiación y dinamización del diariu por ETA, “tampoco nel xuiciu que finó esti mes n’Audiencia Nacional”. Según cuenta Otamendi eso foi polo que la Fiscalía retírase de l’acusación en 2006 y “entama a dicir que nun tien que celebrase’l xuiciu por nun haber motivos”. Pero llueu, mantúvose’l xuiciu por acusación popular, exercida por Dignidad y Justicia y l'Asociación de Víctimas del Terrorismo, “ensin nenguna prueba pa mantener l’acusación de pertenencia a banda armada”.
 
Según cuenta Otxamendi, la propia Fiscalía llegó a poner nel xuiciu “contra la paré” a la Guardia Civil, yá que según l’ex direutor tán acostumaos a poder dicir cualquier cosa, "yá que lo que dicen va a misa". "Ellos nos acusaron de pertener a ETA ensin demostralo, na so idea de que too ye ETA, idea que munches veces ye firmada polos maxistraos de l'Audiencia”, sentencia.
 
Martxelo Otxamendi finó la charra cuntando como los trabayadores de ‘Egunkaria’ deciden el mesmu día del pieslle que tenía qu’haber na cai un diariu en vascu. Asina surde ‘Egunon’ (Tolos díes), un diariu puente ente’l clausuráu y ‘Berria’, el nuevu diariu en vascu del equipu de ‘Egunkaria’, “que viende más exemplares que y tien 24.000 accionistes, cuando ‘Egunkaria’ tenía 1.500, y onde trabayen casi tolos periodistes del primer diariu en vascu”.