Entama’l fin de selmana d’antroxu

|

L’Antroxu entró ayeri coles comadres, pero tovía son munches les cites folixeres que hai preparaes per toa Asturies a lo llargo del fin de selmana. Amás de teatru, música, humor…

Les recomendaciones del fin de selmana entamen güei, yá qu’a les 20.15 hores, nel Teatru de La Felguera, Xuacu Amieva, una de les figures más reconocies del panorama de la música tradicional asturiana, ofrez un conciertu onde va facer una amplia esbilla de cantares y sones de la tradición asturiana, non solo del repertoriu de gaita, sinon tamién de bandurria asturiana, zanfona o flauta.
 
El sábadu, yá dientro de les fiestes del antroxu, que meyor qu’averase a Avilés, onde se celebra’l de más renome del país, declaráu Fiesta d’Interés Turísticu. Esti sábadu ye’l platu fuerte col descensu de la Cai Galiana.
 
Mientres que l’antroxu más tradicional ta en Valdesoto (Siero), onde dende'l Centru Social de Lliceñes a les 16:15 hores, van facer un pasacais hasta la ilesia Valdesoto, onde se representarán 'La Modernidá' de Perge y representada polos escolinos de la Escuela de Faes (C.R.A. de Viella) 'Vaya traces de comedia', de José Ramón Oliva, y representada polos Sidros. De siguío entamará un pasacais nel que tarán Os Reixes de Valledor, Os Reixes de Tormaleo, Vezos Astures, Grupu de Zamarrones de Carreño, el Grupu Teatru de Carbayín y los Sidros de Valdesoto, más toes aquelles persones que quieran mazcaritase al mou tradicional. Cuando acabe'l pasacais, habrá una merienda pa los que desfilen y una chocolatada, too ello acompañao de música del país.
 
El fin de selmana tamién trái teatru n’asturianu, asina, a les 2.15 hores nel Teatru de La Felguera, AC Traslluz pon n’escena “Patrimoniu Familiar”. La obra cuenta como la muerte de Selmo fai qu’Ángeles, la protagonista d’esta obra, s’obsesione con facer un seguru de vida, camienta lo desprotexida que diba a quedar si morriera’l so home. Ataúlfo nun cede y en vista de qu’Ángeles se punxo tan alteriada, cola ayuda de familiares y amigos pónenla a prueba pa saber cuálos son los sos sentimientos, la cosa nun ye tán fácil y los enriedos y engaños espierten les carcaxaes del públicu. Nesta obra queda nidio una inxusticia más hacia les muyeres viudes. La perda del home y al mesmu tiempu de la metá de la paga fai qu’ella sienta qu’Ataúlfo ye’l so “Patrimoniu familiar
 
Pa los amantes del punk y el hardcore, recorda-yos la cita na xixonesa Sala Savoy, onde esti sábadu a les 22.00 hores hai una triple ración con tres grupos asturianos. El punk-folk de los xixoneses Skontra y el hardcore d'Adizion Etilika acompañarán a Odio Visceral na presentación del so primer discu "Ye lo que hay", que resume los sos mas de 15 años d'actuaciones.
 
Yá en domingu, siguiendo coles fiestes d'antroxu, Xixón acueye a les 12:30 hores, la segunda Xornada del Desfile Infantil. Mientres qu’a partir de les 16:30, hai un Concursu Infantil de Disfraces con papel. Les actividaes d’antroxu en Xixón finen a les 19 hores col Concursu de Charangues.
 
Mientres, n’Avilés, a les 19.00 hores na Pista de La Esposición de Les Meanes, abra una actuación y desfile de fanfarries con Paentamala d’Asturies, Los Gabilanes de Vlencia y Os Trompos das Nicras de Galicia.

Contador Estadistiques