Damian Barreiro

Fai una selmana qu'envié esta carta, vía corréu a Público y a la Voz de Asturias y hasta la fecha nun la publicaron.
LA VOZ DE PÚBLICO
 
Soi un llector del diariu Público dende qu’apaeció nel escenariu de la prensa. Tengo que dicir al respective que me presta la llinia editorial, los conteníos y el tratamientu seriu y comprometíu que se da a la información y a les noticies.
Cuando hai unos meses m’enteré de que la editora qu’espubliza esti diariu diba facese cola cabecera de La Voz de Asturias sentí una alegría grande y dixi pa min: a la fin vamos tener un diariu nuevu que va trayer aire fresco al nuesu país. Avezáu yá, gracies a Público, a otru tipu de periodismu, comprometíu y plural, onde les minoríes tamién tienen sitiu, pensé que La Voz de Asturias, no referente a Asturies, diba siguir una llinia asemeyada.
Nel actu d’inauguración y presentación de la cabecera nueva n’Uviéu, onde deberíen tar presentes toles “fuercies vives” de la Comunidá, la presencia de persones representatives del mundiu políticu, académicu, cultural, artísticu, musical, etc. comprometíu col asturianismu, y de manera especial cola llingua asturiana, foi nulu. Lo que yá badagüeyaba un mal empiezu.
A midida que foi pasando’l tiempu los malos presaxos foron confirmándose, y a día de güei tenemos un periódicu más, que diz coses asemeyaes y d’una manera paecida al restu de la prensa que se fai n’Asturies.
L’editorial, les noticies, los columnistes y en xeneral el periódicu en conxuntu sigue dando a tolo que tien que ver cola cultura y la sociedá asturiana un tratamientu mui poco plural, acomplexáu y nada comprometíu. Ye significativu’l pocu espaciu que se dedica a la nuesa llingua nes páxines del diariu. Esperábemos que l’espíritu alternativu, críticu, comprometíu colos movimientos sociales, coles espresiones alternatives, coles ideoloxíes non complacientes se contaxare de Público a La Voz de Asturias. Foi pasando’l tiempu y nun vemos que se vaya nesi sen. Nun hai gotu de garra, nin de trabayu por reflexar l’Asturies non combayona, participativa ya inquieta, que la hai y que mos interesa. Sobren sitios onde lleer los “argumentos” de los de siempre.
Cónstame que la mayoría de les persones que lleen Público (qu’agora lleen tamién La Voz de Asturias) participa en mayor o menor midida conmigo nesta crítica. Pue ser que nun síamos una mayoría social, pero’l sector de xente que mos identificamos con Público esperábemos que la versión asturiana reflexare la mesma llinia editorial. Queremos más mercar y lleer Público qu’otros periódicos estatales, pero nun alcontramos razones pa lleer La Voz en cuenta de cualquier otru periódicu editáu n’Asturies. De momentu vamos siguir aguardando’l cambéu.