Lleón, trubiecu del parlamentarismu européu

Castiella y Lleón va reconocer la Colexata de San Isidro de Lleón, como sede del primer parlamentu occidental, al albergar en 1188 la primer asamblea con representación popular.

El presidente de les Cortes castellano-lleoneses, José Manuel Fernández Santiago, fairá efeutivu’l nomamientu’l próximu 25 de febreru, cuando nel marcu del aniversariu del Estatutu castellano-lleonés, entregue a la Colexata la Medalla d’Oru de les Cortes, que’l pasáu xueves 4 de febreru concedieron por unanimidá tolos grupos de la mesa de la institución.
 
Foi en 1188 cuando San Isidro acoyó la primer asamblea del mundu occidental con representación popular, al tar representaos los tres estamentos. Per un llau los privilexaos; cleru y nobleza, y per otru los non privilexaos; los representantes de les ciudaes.
 
Les Cortes lleoneses reconocieron una serie de drechos, una especie de Carta Magna del Reinu, onde se falaba de la inviolabilidá del fogar y del corréu o la necesidá del Rei de convocar Cortes pa facer la guerra o declarar la paz. Amás, promulgaron una serie de lleis pa protexer a los ciudadanos contra’l poder de les clases privilexaes.
 
A los pies d’esta basílica tamién s’alcuentra’l Panteón de los Reyes de Lleón, onde tán los sepulcros de dellos reyes lleoneses y otros miembros de la familia real.

Comparte...                                    

Enllaz permanente