Andecha y PAS refuguen que barcos gallegos pesquen n’agües asturianes

Andecha Astur y Partíu Asturianista refuguen la posibilidá de qu’ente cinco y diez cerqueros gallegos pesquen nes agües interiores d’Asturies.

Les organizaciones esixen a la Direición Xeneral de Pesca del Principáu, que nun-yos permita faenar equí, atendiendo a les razones espuestes polos pescadores asturianos. Asina, súmense a la postura amosada estos díes por Rafael Rodríguez, presidente de los armadores de cercu asturianos, y Dimas García, de la Federación Asturiana de Cofradíes.
 
Según señalen, los barcos del país vecín quieren pescar nes nueses agües interiores pa “garantizar abastecer el mercáu”, pero los armadores de cercu asturianos, anguaño hai cuatro n’activu, refuguen tala posibilidá “yá que los caladeros asturianos tan lloñe del so meyor momentu y afiten que’l desembarcu de más kilos de pescáu tendría como consecuencia una baxada de los precios, yá de por sí ruinos”.
 
Permitir esta primer entrada a los gallegos “que yá esquilmaron les sos propies agües”, va suponer esquilmar les agues asturianes, espliquen, “y non sólo impidir el desendolque de la flota asturiana  sinón desaniciar lo poco que queda, al tener que competir colos gallegos y les sos téuniques esquilmadores”.
 
Andecha y PAS quieren conseñar la responsabilidá política del Principáu nel “desaniciu” del sector pesqueru asturianu, destacando que “nun se trata sólo de la so incompetencia na materia sinón del resultáu d'una planificación fecha a la escontra de los intereses d’Asturies dientro de la dinámica de sumisión del "Principado" a los intereses gallegos y a la política del Estáu español de desaniciu de los sectores económicos tradicionales n’Asturies y facer, pola contra, del nuesu país una provincia de xubilaos y camareros”.
 
D’otra miente, AA y PAS van a pidir a los Ayuntamientos d’Avilés y Colunga, onde s’abelluguen los barcos de cercu asturianos, que se posicionen sol tema y presionen a la Direición Xeneral de Pesca.