Los Premios de la Música yá tienen finalistes asturianos

Mapi Quintana, Dixebra, Spanta la Xente y Músicos pola Oficialidá son los finalistes a la meyor canción n’asturianu de la  XIV edición de los Premios de la Música qu'empobina l'Academia de les Artes y les Ciencies de la Música. Los ganadores de les estremaes categoríes, ventiocho en total, daránse a conocer en Madrid el 17 de marzu, nuna gala que TVE tien el vezu de tresmitir en direuto.

 “11 de mayu”, de la que Mapi Quintana ye autora ya interprete; “Cantar de redención”, interpretada por Dixebra y de la que son autores Paco Álvarez y Sergio Rodriguez; “El canciu’l mineru” de Saul Quinones ya interpretada por Spanta la Xente; y “Ye lo que nos pasa” de Músicos pola Oficialidá con lletra y música d’Aique García, Quique Faes y Sergio Rodríguez, son los cuatro cantares nominaos.
 
Mientres que los cantares «El mio sitiu» de Lafu&Rebeca, «La casa’l mieu» de Misiva, «La nada y tu» d’Alfredo González, ganadora l’añu pasáu del Premiu al Meyor Cantar n’asturianu y representantes d’Asturies nel Liet International, algamando’l novenu puestu, «Palombina blanca» de Laura Díaz, el cantar n’eonaviegu «Queimar el cielo» de Bacotexo y «Una de gallus» de Fe de Ratas, esbillaes como prefinalistes, nun pasaron la triba p’algamar un puestu ente los nominaos.
 
Tampoco “Fíos d’esta tierra” de Spanta la Xente y “El sonar de les semeyes” de Mapi Quintana pasaron la triba pa la categoría de meyor álbum de música tradicional. Tampoco lo fixo “Amor incendiariu” de Dixebra na categoría de meyor álbum de rock alternativu. Categoría na que si tán nominaos los xixoneses Doctor Explosion pol álbum “Chupa aquí”.
 
Los ganadores dende la creación de la categoría, una reivindicación del coleutivu de músicos asturianos, foron Pepín Robles con «Nunca máis» (2004), Chus Pedro con «Agora sal a bailar» (2005), Los Berrones con «Fai deporte» (2006), Rossaleda Jazz Quartet con «Na fonte» (2007), Tejedor con «Seique non» (2008) y Esther Fonseca con «Negra» (2009).
 
“11 de mayu” de Mapi Quintana
“Cantar de redención” de Dixebra
“El canciu’l mineru” de Spanta la Xente
“Ye lo que nos pasa” de Músicos pola Oficialidá

Comparte...                                    

Enllaz permanente