Ontes, BebederosY Llavaderos

Realmente, l'emplazamientu d'asentamientos humanos tuvo siempre condicionáu a la esistencia d'agua nel territoriu. L'emplegu d'esti recursu propició la construcción de determinaes estructures pal so meyor aprovechamientu, que varíen en función del usu que se-yos va a dar. Llámase manancial , al llugar de nacencia de les agües, cuando surde la corriente soterránea. Si ye d'escasu caudal, enforma charca, llámase fontán y rodeáse de piedres, a mou de presa. La mayoría los mananciales son aprovechaos con fonte, bebederu y llavaderu. La fonte resulta d'atrapar un manancial con un muru o un depósitu y espeta-y una pieza que fae que l'agua nun caiga pegao a la pared, permitiendo recoyela con un caciplu. La más primitiva ye el pingu o pingón, que ye una pieza de piedra empotrada na muria, con una canal na parte superior. Nos mananciales más primitivos, o nos priales de montaña, suel tar a modu de pingu una fueya castañu que permite beber na mano.
Los caños son los elementos más utilizaos y, nel pasáu, la mayoría yeren de fierru. L'agua a la salida va a caer al duernu o pilón, que tien tamién varies versiones: la más cenciella consiste en poner una llosa de piedra enbaxu'l chorru l'agua sobre la que se coloquen los cacíos. El frontal de la fonte ye variáu. Ta la simple muria de calicantu, que caltién el manancial y n'ocasiones ta enlucía con morteru de cal o de cementu. Pero tamién puede destacase con elementos ornamentales, comu frontones, pilastres, cornises, etc. En dellos casos incluye tamién inscriciones, la fecha de construcción, los construtores, el nome.. , tamién pude tener grabaes cruces, trisqueles,etc.

Los bebederos pal ganao o bebezones, son otru de los aprovechamientos clásicos de los mananciales. Suel ser un pilón de forma rectangular, descubiertu, calicantiáu y enlucidu con morteru. Lo más normal ye un ·nicu pilón pero tamien pueden ser dos n'angulu p'aprovechar l'espaciu. El nivel del'agua suel tar a un metru o metru y mediu del suelu, pa que la reciella pueda beber a comenencia y non estrafullen l'agua o se metan dientru.
El llavaderu ye la parte más complexa de les tres. Dafechu, ye'l ·nicu que ye edificiu.La pieza fundamental ye un pilón pal agua, del cual, les paredes, al menos por un llau, tan remataes en bisel, de modu que sobre la rampla formada pueda manipulase la ropa. Esta rampla llámase llavadera y suel tar formada per grandes lloses de piedra, caliza o arenisca ,con una inclinación de 30 o 45%, que permite llavar la ropa ensin reblagase. Dependiendo del tamañu puede tener ún, dos y hasta tres pilones, separtaos por bolugos que comuniquen l'agua ente ellos. Casi toos los llavaderos cuenten con un teyáu pa poder llavar a pesar de les inclemencies del tiempu, sosteníu por murios y pilares. La disposición nel terrenu del conxuntu formáu por fonte, bebederu y llavaderu, suel responder a tres tipos: llineal, cuandu alcontramos los tres elementos colocaos unu a continuación d'otru, compacta, cuando'l bebederu y el llavaderu tan adosaos por los llaos más llargos y la fonte nun de los estremos, y dispersa, si tan los tres elementos separtaos bastantes metros. En cualquier casu, la circulación del agua nel conxuntu lleva simpre la misma dirección: de la fonte al bebederu y desta al llavaderu. La razón ye hixénica: l'agua pal consumu humanu ye la de la fonte, el ganau bebe del bebederu l'agua llimpia y la que sobra destos dos usos ye la que se mancha de xabón nel llavaderu.
Los nomes vienen-yos daos a les fontes: pol emplazamientu (La Carbayera), por aludir a persones rellacionaes con elles (fonte de Madalena), pola toponimia (fonte del MuselÍn), pola forma (fonte'l Güeyu), con nomes relixosos (fonte de San Pelayu), con derivaos de fonte (El Fontán, La Fontana), pol carácter hestóricu o pola calidá de les agües. L'agua fue siempre considerada dende la oscuridá de los tiempos como fonte de vida y llar de los dioses. Espresión d'esti mitu fonderu , son les náyades griegues, les morganes bretones o les xanes asturianes, divinidaes toes que habiten nes fontes. Aparte desta relación cola mitoloxía, les fontes tan muy arreyaes a ritos máxicos d'orixen paganu, qu'algamen particular significación na nueche de San Xuan.

Esa nueche entá güei s'enramen les fontes, dafechu,más cada vegada. Asina qu'esti añu, la nueche del 23 de xunu, cuandu embornie la foguera, alcordáivos de dir a la fonte a coyer la flor del agua, antes qu'enrisque'l día ¡y que seyáis perdichosos!

Pilar Sánchez Vicente