Más regalos pal meyor blogue 2009

Los ganadores del meyor blogue 2009 van recibir, amás de CDs cola cabera versión d’Ubuntu, dellos exemplares del últimu númberu de la revista Formientu.

Amás del premiu que  Softastur y el LoCo Team Asturianu cedió y que consiste en 4 CDs orixinales de la cabera versión d’Ubuntu 9.10 con tol sistema operativu n’asturianu, incluyíu l’instalador pa los tres primeros blogues ganadores y pal blogue ganador del meyor diseñu, l’asociación Xareos! Xestión Cultural van ceder dellos exemplares del últimu númberu de la revista Formientu, pa los ganadores del meyor blogue 2009.
 
Dende la organización tamién informen que siguen llegando votos al corréu cuando entá queden 12 díes pa finar les votaciones. Señalen que les posiciones de los blogues de cabeza yá tan afitándose claramente, “onde hai cuatro o cinco blogues que se tan xugando los primeros puestos”.
 
Del mesmu mou, espliquen que queda bien poco pa que saquen a la lluz un proyeutu nel que llevan trabayando les últimes selmanes y que ta direutamente rellacionáu cola bloguesfera n’asturianu. “Ye un proyeutu entamáu con ilusión, necesariu y que necesita de la participación direuta les blogueres y blogueros que formamos esta comunidá”, señalen ensin dicir más datos de lo que se trata.