Llanera torga la celebración d'un actu de Fai! na Casa Cultura

Una asamblea que'l colectivu Fai! tenía convocada'l 8 de xineru na Casa la Cultura de Llanera nun pudo celebrase, según la organización, al cancelala espresamente l'Alcalde y la Conceyala de Cultura y Muyer. L'anulación del permisu, “que fuere concedíu con tolos pilancos por usar la llingua asturiana” llegó a 24 hores de la celebración de l'asamblea.  

 La organización vien d’amosar, al traviés d’un comunicáu, les torgues puestes pa celebrar una asamblea abierta. Primeru esixendo per parte del Conceyu l’usu del castellán na solicitú d’un local públicu, pa depués denegala en cuatro ocasiones, la definitiva “ensin aportar contestaciones per escrito, nin informando oralmente de les razones qu’impiden el drechu a la llibre xuntanza en dependencies públiques”.
 
Fai! pide a tolos ciudadanos, y especialmente a los vecinos de Llanera, el so sofitu pa poder articular a pesar de toles torgues un movimientu que saque a la lluz los verdaderos problemes del Conceyu y los d’Asturies en xeneral. Desixen al empar, una esplicación al Alcalde de Llanera y a la Conceyala de Cultura y Muyer de por qué se dexó en manes de la Casa de la Cultura la concesión del local pa celebrar l’asamblea pero depués se refugó dicha concesión “ensin motivu dalu”.
 
Pa Fai!, a la corporación del conceyu de Llanera, en manes del Partido Popular, “molésta-yos que nes instalaciones públiques se desendolquen actividaes que nun controlen". Según esclarien, “esti tipu de fechos constata qué ye lo qu'entienden la inmensa mayoría de políticos por llibertá d'espresión”.

Comparte...                                    

Enllaz permanente